Film Changtupa Nih Dan

I damchhung hun tur hriat loh. I thih hun tur pawh hriat loh (mahni inthat I nih loh chuan).

Nunna pakhat chiah kan nei a, mi naran ni lovin a changtupa nih I thlang zawk ang.

Mi naran hringnun……

He khawvela lo pianga seilian, mi tih ang zela tiin a khawsa a, ama duhzawng ni lovin mi tha tih leh fak turin a nun a hmang ral a. A hringnunin awmzia tak a nei lo, a chhungah hlimna tak a awm lo.

Hringnun awmze nei lova damchhung hun khawhral duh kan awm lo. Amaherawhchu mi awmdan, an nunphung leh an hun hman dan enchiang ila chu chiah chu, nun awmze awm lo. An nunah tumna, hmasawnna leh hlawhtlin duhna a awm lo. Zing thawh tichaktu an nei meuh lo. An phum hma chu an nung ve mai mai chauh a ni.

Nun satliah chu thihnain kawngka a rawn kik huna la inchhirna tur a ni. Thi tep tawh tar upate inchhirna lian ber chu an duh dana nung lova midangte duhzawnga an nun an hmanral vang a ni. I thih dawn hunah I damchhunga midang tihlawm tum ringawta I hun leh nite I khawhral zozai kha pawi I la ti ang.

Mi tihsual leh inchhirna hi inzirnan hmang rawh.

I duh duh nithei ta la engnge I nih ang? Dawn chiang rawh.

…………

Film En Lo Kan Awm Lo

Film/Movie-ah chitin reng en tur a awm a. History a mi huaisen, pasalthate atangin superhero movie, a taka kan neih chak em em power neite.

Film en chuan a changtu ber kan tan thin. Midang aiin a chungchang kan hrechiang a, kan hmuhnemin kan lainat zawk a. A tirah mi tlaktlai lo tak a nih pawhin a insiamtha a, film tawpah a tum a hlawhtlin ngei kan beiseipui thin.

Film tawpah hmeichhe hmeltha tak kha a neih kan duh a, a thih loh kan duh a (a changtu ber a thih hi chuan film a zo hi rilru a ngui ruai thin), hlimna a chhar kan duh thin.

A changtupa chu film hmahruaitu ber a ni. Kan ngaisangin amah ang nih kan duh theuh. Miin movie leh filma changtupa ang nih ve an chak a, an suangtuahnaah chiah ni thei turah an ngai.

Kawng pakhat awlsam deuh hmangin film changtupa I ni thei. Zirna sang degree engmah neih a ngai lo.

Film Changtupa Nih Dan

I inring em? He thupuan hian I nun a thlak danglam vek maithei.

Tunah khan filmah I chang mek. I hringnun kha film a ni. A changtupa ber chu tudang mah ni lovin nangmah ngei.

Tunah khan I inen chuan a changtu ber atan I tling tawkin I inhre lo maithei. I hmel, I taksa, I mizia tha tawka I hriat loh pawhin a pawi miah lo.

A tirah engkim thiam nghal vek kan awm lo. Famkim kan awm lo. Movie ah chauh lo chuan (hah).

I nun I hmuh dan kha thlak danglam rawh

Tun atang chuan film I chang mek a, video camera in an zui reng che. I thiltih mi thlir let theih turin an record.

Tunah chuan a pangaiin hun I hman ka ring tawh lo. Mi hmuh theiha tih lan ngam loh tam tak I nei ngei ang. Nei lo kan awm lo. Mahse awmze nei lova hun khawhral mai mai chu I ti tawh lovang.

Nichinah enge nih I duh tih ka zawh tawh che kha. I awmdan, chezia, taksa zaizir, tawng dan thlengin I mi nih duh ang tak kha entawn la, I nunphung tidanglam rawh. A changtupa tak takah inngai rawh. I rilru ngaihtuahna chu a taka hmuh turin a rawn inlar thin.

Amaherawhchu inngaihruat ngawt a tawk lo. A changtupain thil pawimawh tak a la mamawh.

A Changtupain Tum A Nei

A changtu ber I nih chuan Tum [Mission] I mamawh.

Keini nitin khawvelah misual rual va thah tur mission kan nei lova, kan sawrkarin a ruka mi enthla turin min tir lova, an thu kan zawm loh chuan kan hmangaihte thah tuma vau an awm hek lo [turah ka ngai].

Keini hringnunah duhthlang thei kan ni. Kan tum leh duh a inan loh theuh avangin I Tum tur ka hrilh theih lo che. I thinlung chhungrila I vei ka hre lo.

I thinlung duhzawng chu ngaihtuah la. Ziak thla rawh. I suangtuah theih phawt chu I ziak thla thei.

I thil ziah thlak chu I Tum [Mission] a ni.

I hlawhtlin theih turin ruahman rawh. Hlawhtlin tumin I theihtawp I chhuah anga I hun, tha leh thiamna zawng zawng I seng ang.

Heihi ka ti dawn ti la, ti rawh.

I Tum [Mission] tluka pawimawh a awm lo. Thil tenau leh ho mai mai I tum aiin a hmasa thei tawh lo.

Mitin Changtupa An Ni Thei Lo

A changtu ber nih duh theuh mah ila mitin tan a ni lo.

Mahni nun thlak danglam a ngaih avangin a changtu ber nih hi thil awlai a ni hauh lo. Mi tlangpui chu a sira lo awm ve mai maiah an inhmeh zawk. A harsa lova a him zawk bawk.

Mi tlangpuiin thil awm dan pangai thlak an duh lo. Kum tel a ral pawha hmasawn miah lohva lungawi tawk an ni. A harsat deuh hleka beidawng mai thin an ni. Engkim inti hre em em vek maite, an nun pangai a hahdam tawk em avanga inthlak duh lote, tawng zawt zawt a tak hmuh tur awm si lote, a rah seng ve duh si mahni tha leh zung seng duh lote.

Heng mite hi a changtu ber an ni dawn lo. An rilru an siamthat hma chu a ngai reng an ni ang.

Beidawng Duh Lo Lawmman

A changtupa nih chu mahni nawmna kalsan a ni fo. A changtupa nih chu nakina lawmman dawng tura tuna hrehawm tuar a ni fo.

A changtupa nih chu kan hlauh hmachhawn a ni. A changtupa nih chu pawn atangin nawm hmel mahse mi hmuh lova kawng biboh tak a ni thung.

He thu hi mi tam zawkin an zawm dawn lo tih ka hria. Zawm suh se. Thenkhatin sawisel tur an zawng dawn. Ka pawisa lo. An duhdanin nung rawh se.

He thuziak leh he website Zakzum Hmeltha hi mi tlemte, an nun siamtha duhte tan a ni. Heng mite hi tlem mahse he khawvel hi an lawmman tur a ni. An zingah hian I tel ve mahna.

I nun a nia, I duhthlan tur a ni e.

 

Intawn leh hma chuan,

– Zakzum Hmeltha