Hun rei tak chhung chu ka duh leh mamawh hre hrang lovin bungrua ka khawl khawm thin a.
Chhungkua hausa a piang leh seilian ka ni lova, ka naupan tet atangin rual ka awt nasa thin hle. Ka tetlai atanga ka rilru ngaihtuahna chu ka puitlin chhoh pui a, ngaihtuah miah lovin a tam apiang hi a tha turah ka ngai ngawt zel thin.
Vawikhatmah hman loh tur leh tangkai pui miah loh tur ro khawl khawm teuh hi mi rethei rilru puthmang a ni tih ka lo hre ngai lo.
Thil lar vang emaw mi neih ang neih ve duh avangin I mamawh loh thilah sum hlu tam tak I khawhral tawh em?
I retheih chuan I duh lei thei dinhmunah I awm lo.
Lehkha zirlai sum tlachham I nih chuan I duh lei thei dinhmunah I awm lo.
Leiba I neih chuan I duh lei thei dinhmunah I awm lo.
Chhiatni atan bik sum dah that I neih loh chuan I duh lei thei dinhmunah I awm lo.
Midangin an neih avangin I lei ve kher a ngai lo.
Duh leh Mamawh Danglamna
I thil duh chu I mamawh a ni lova I awh mai a ni. I damchhungin nei thei dawn lo mahla I thih phah lovang.
Mamawh chu a tel lova I nun theih loh a ni thung. Nitina nung tura kan mamawh chu tlemte chauh – Thawmhnaw tlem, chaw ei tur, tuisik, leh awmna him. Heng thil 4 hi kan mamawh bulpui berte an ni. Dam lohna telh lovin – khawvela ram retheiah mi tamtak an thihna chhan chu heng mamawh 4 an neih theih loh vang a ni. Thawmhnaw, chaw leh tuisik, awmna him.
I thil duhte, a tel lova I nung thei dawn lova I hriatte I duhna chhan I ngaihtuah chiang ngai em.
Miin thil lei an duh chhan – ZH tih hi ka chhana.
1. Miin a tha tih an sawi thawm an hria
ZH – I mi rinte, mi remhre takte an nih loh chuan “miin an ti” tih vangin a that phah kher lo. I mamawh anga I hriat tak tak chuan nghak phawt rawh. Tuna I duh thut vangin lei nghal suh.
2. Mi thik leh awh nih an chak
ZH – Awmze nei lova mi intihtheih khum chu hlawkna a awm lo. Chanchinthar zawk a rawn awmin an theihnghilh thuai ang che.
3. Mi thusawi leh titi nise an ti
ZH – Sum nei tak tak lo bungrua nei tha/ngah an tam mai. Engmah an ni lo. Pawnlam manto, chhunglam rethei.
4. Midangin an nei a, nei ve turah an inngai ve ringawt. Nei lo bik nih an duh lo.
ZH – Mi tih ang zel I tih chuan engah I chhuak dawn lo.
5. TV leh chanchinbuah fakna an hmu
ZH – Fakna duhdan ang chiahin I ti zawm dawn tihna. I mamawh lo. I lei vangin fakna ami ang I nih phah dawn lo. Fakna chu lemchan leh phuahchawp vek.
6. A ruka an ngaihzawn deuhin a nalh an tih thu an sawi
ZH – Miin an duh phah che beiseia I lei chuan an duh phah dawn chuang lo che. Hmeichhia tihlawm tum lutuk chu anmahni tlanchhiat tirtu a ni hlauh thung.
7. Milar an ngaihsanin an nei
ZH – Milar ho chu an sponsor a – tilar turin pawisa tam tak an pe. Nangin I pawisa neih lohin I lei ve thung.
8. Thil thar lei an atchilh.
ZH – Tul lova pawisa hmanna leh retheihna. Hlim anga inngai turin I lei reng a ngai. I hlim chhung chu hun reilote.
Kan thil awh em em te hi kan enchian chuan kan duh tak tak ni lovin midangin min tihmuh vang te an lo ni thin.
Duhna a tawp thei lo
Thil neih tam chuanin a dang duhbelh zelna a siam.
I ngah tawkin I inhre thei lovang. I lei anga, I duh dang sale tha I hmu anga I lei leh ang.
Pawisa chuang bang tlem I nei deuha I hriat chuan ngaihtuah miah lovin I lei zel ang.
Thil chhuak thar zawk chu a awm zel dawn, style chu a inthlak zel dawn. I la neih loh lei tur chu a awm zel dawn.
Mi neih ang I neih ve kher loh vangin lungchhe lo la thik duh suh.
An hlim bik chuang lo.
I neih lohah ringawt I ngaihtuahna I seng chuan hlim a harsa em a ni. Chu ai chuan lawmna tur zawng zawk rawh.
I nuna thil te takte vang pawhin lawmna tur a awm.
Tunlai thlasikah ni sa engin mi rawn chhun te hian ka lawm thin. Thil hote mah nise vawiina ka lawmna ni lum a ni.
Intawn leh hma zawng,
Zakzum Hmeltha
Leave a Reply