Chanchinthar nazawng hi thudik a ni lo. A lar leh hriat hlawh apiang hi a dik hek lo.
Gospel Thurin anga ngai tawk an lo awm thin a.
A nih loh zia kan enfiah ang.
Journalist Hna Enge?
Journalist hna chu mipui tana chanchinthar a nih ang chiah chiaha puan chhuah a ni. An duh ni lovin thudik chu mipui tan an chhuah tur a ni.
Chanchinthar nazawng hi awih tur a nih lo
A chhan chu journalist kan tihte hi an hna a nih tur anga an tih loh thin vang a ni. Chanchinthar phenah hian thil thleng tam tak a awm thin.
#1) Mi Hnuaia Hnathawk An Ni
Thenkhat chu an duh vang reng ni lovin an hnathawhna in an chhuah theih leh theih loh tur a thliar hran sak thin. An hnathawhna hi company lian tak hnuaia thawk leh hlawh pek an ni fo.
An hlawh petute duh loh leh hlawk lohna tur chanchin chu an chhuah dawn lo hrim hrim.
USA in Iraq an do khan indona chungchang ziak turin indona hmunah journalist US sipai bulah an cheng a. Mipui lo chhiar atan US sipai a tha lo zawnga tarlan leh sipai hotute duh loh tur chu chanchintharah an chhuah ngai lo. US army hnuaia hnathawk ni lo mahse an thuziah apiang an lo chhiar theih avangin an thuchhuah a thlak danglamna a chiang hle.
#2) Tan Bik An Nei
Chanchinbu hrang hrang hian tan bik an nei. Politics leh inthlanna hi lo en ta ila – Mi pakhat ti hmelhem turin chanchin a tam thei ang ber an chhuah laiin lehlam chhiatna an chhuah duh miah loh chang a tam. Chung lam hotute inkarah inthurualna a awm chawk.
Tan bik an neih bakah tum an nei tih hriat tur. An thuchhuah hmangin thlirtute leh chhiartute rilru an duh dan zawngin an kuai thin.
An duh an neih theih dawn phawt chuan dawt leh thudik lo chhuah pawisak lohna khawvel a ni.
#3) Ralkhat atanga Journalist
Chanchinbuin thu an chhuahin a chhuahna bulpui (source) ah chumi khami chuan an ti, tiin an chhuah a. Tam tak an han chhui chian leh chuan an source chuan chumi khami chuan an sawi lo tih ve lehin a dikna finfiah theih lovin a vir kual hrep thei. Thawkhatah phei chuan anmahni ngei mai a bulpuiah an chhui let leh.
Chanchin tam takah journalist-in an hriat chian loh midang sawi anmahni tawngkaa ziak lehchhawngin an chhuah a, hmun hran daiah midangin an lo chhuah chhawng leh a. Khawvel pum huapin a kal kual ta thin a.
Mi sawi miah loh leh thil thleng ni miah lote hi a ni angin an chhuah kual nghek ta thin a ni. Heihi football thuthangah kan hmu nasa hle. Football-ah chauh a ni hek lo.
Thu tak hria journalist ni lovin ralkhat, mahni office chhuahsan lo, mi sawisa sawi chhawng leh journalist an ni fo.
Mizorama Chanchinbu Tehkhinna
Mizoram chanchinbua ram pawn chanchin an chhuah hi enfiah ila. Kan sawi tak ang hian an chanchin lehchhawn leh hi a dik a awm rual rualin a dik lo a awm teuh.
Mizoram mipui chanchinthar chhiara lo en tan chuan thu dik veka ngaih chi ngawt a ni lo.
_________________
Tunlai Chanchinthar Rintlak A Nih Loh Chhan
Journalist tha ber award pawh lo dawng tawh Nick Davies chuan a lehkhabu Flat Earth News ah tunlai chanchinbu rintlak tawh loh zia a puang chhuak a. A thupui tlangpui han tarlang ila:
1) Tunlai journalist hoin an thuziah dikna enfiah hman lek lovin a tam thei ang ber news an chhuah.
Anmahni thil tawn ngei atanga chanchinthar ziak an tlem tial tial. Chanchin finfiah hi sum leh pai a hekin thil awllai a ni lo. A tam tak zawk hi chu press release leh midang thuthang sawi ziak lehchhawng mai an ni.
2) News Agency-ah an innghat luat.
Entirnan news agency lian Press Association (PA), Associated Press (AP), Reuters press release-ah an thuziah tur an innghat mah mah.
Heng News Agency te hian anmahni harsatna ang tho tawkin an reporters zawng zawngte thuthang finfiah turin an thawn thei bik lo. Press release a thusawi pawh hi thudik veka lak tur a ni hek lo.
Chu mai bakah news agency te hian local chanchinthar atan an rin veleh thung thin a.
3) News lar leh mipui chawk tho tur an thlan zawk avangin news pawimawhin a tuar phah.
Chanchin chhuahtu tum ber chu chhiartu/entu tam thei ang ber neih a ni. Chanchinthar I chhiarin a thupuiah mi chhiar chak deuh tur an thlan thin hi.
Milar chanchin leh Sex tlangthanna chunchang hralh a tla a hmuh tur pawh a tam. Hralh a tla apiang an chhuah avang hian news pawimawh zawkin a tuar phah thin.
4) Chanchin hautak lo leh tlawm zawk chhuah an thlang.
Tunlaia thil thleng aiin a chhuah awlsam apiang an thlang fo.
Chu bakah thil pakhat chhiat tawhna lian tham, mipui chhiar duh tur an chhuah vut vut laiin a dang tenau deuh mahse amah ang chiaha nasa an chhuah leh lem si lo.
Tehkhinnan Hurricane Katrina kha mi hriat hlawh leh lar em em mai a ni a. Chutih rualin ani anga hlauhawm ve tho Hurricane Stan kha chu mi tam zawkin an hre miah lo thung. A chhan chu Hurricane Katrina kha a hmunah an awmsa avangin journalist tan chhuah a awlsam a. Hurrican Stan kha chu ramdang niin a hautak thung.
5) Company lian hnuaia thawk an nih avangin an hlawk lohna tur chu an aia lal ten chhuah an phal lo.
Heihi chu a hmaa kan sawi tawh ang khan.
6) Agency lian leh thiltithei CIA angte hian ram tin hmun tinah chanchinthar neiin an duh dan angin journalist te hi an chhuah tir thin.
Chanchinthar thiltihtheih zia kan hria. History ah vawi tam hetiang thil hi a thleng tawh. Thudik ni lovin mipui hnena an thu hrilh duh zawk chu an hnuia chanchanthar puangtu hmang hian an chhuah thin.
Khaikhawmna
Chanchinbu chhuahtute hi sumdawnna chi khat tho a ni tih hriat tur. Mipui tana thuchhuah tawh hi chu sawimawi leh tum neia chhuah a ni fo thin bawk. News hi thiltithei tak a nih avangin mipui tihthaihnana hmarua tha tak a ni.
Tunlai khawvelah thiamna leh inbiakpawhna a sang tawh avangin a hma ai daihin khawvela thil thleng kan hre nasa. Thuthang dik leh dik lo hi rang mangkhengin a darhchhuak thin reng a ni.
I beng chhi la, I mit hawng rawh.
A tawpah chuan news leh khawvelah engpawh thleng lo se nangmah bak I ni thei chuang lo. Tha takin inenkawl rawh.
Hasta la vista,
Zakzum Hmeltha
Leave a Reply