Location: Ka dawhkan bial puan vara khuh
Date: May 9, 2016
Tunge ka nih mi hriat reng le?
He khawvela lo pian hi ka duhthlan a ni lo.
Eng vangin nge keima duhthu pawh ni lova min hruaichhuah mai?
Lunglenna leh mahni chauha hrehawm tuar tur rengin mo ka lo pian. Min hrethiam lah an awm mang si lo.
Tunge ka nih mi hriat reng le?
Ka mit ngeiin mi vanduai zia, an chanhai zia ka hmu.
Vawi engzat nge ka hlawhchham tawh ka hre seng lo, chutichung chuan I zahngaihna ka la dawng nitin.
Eng vangin nge kei ber kher vawi tam mi ngaihdam. Thihna vawi engemaw zat ka pumpelh tawh a, khawvel hranah ni se chuan ka boral tawh ang.
He leiah hian ka rawn piang a, nakinah ka boral anga theihnghilh leh mai ka la ni dawn.
Ka cham chhung hun reilote chhungin vawi tam ka thlahthlam tawh che, ka la thlahthlam leh lovang che tih pawh ka sawi thei lo. Nang erawh chuan ka sual ber lai pawhin min awmpui fo.
Keimah chauha ka awm thin emaw ka tih thin laite kha ka ngaihtuah that leh a ngai.
Midang aia ka neih tlem zawknate, ka that lohna laite midang hausakna lai nen ka tehkhin fo a.
Lungawi lohna lo thlen chang awm thin mahse darthlalangah ka in enin mi vannei tak ka nihzia ka haider thei lo.
Rilru tha, mahni insiamthat duhna rilru min pe a, mihring ka nihna, ka tlin lohnate mi chanhaite nen tehkhin chuan he khawvela mi vannei ber ka lo ni.
Eng nge he khawvela ka pianchhan?
Chi pahnih inzawm atanga mi maktaduai piang thei zingah kei ka lo piang.
Ka vannei nge ka vanduai zawk?
Ka duh thuin ka sual thei, ka duh thuin midang nun ka tihrehawm thei. Duh thlan theihna ka nei alawm. Mahse ka thinlungin chutiang ti tur chuan mi phal lo.
Ka nihna a ni lo.
Ka damchhan chu [I damchhan chu kei aiin a danglam].
Ka pian tirh ata hrehawmna, harsatna tinrengin min tlakbuak pawhin ka sual chhuak zel a. Ka mal em em laiin, thian ka mamawh em em laiin ka tuar zel a.
Tuar mai piah lamah mahni hmasawnna atan ka hmang zui a. Vawiin ni kan lo chuangkai ta der mai.
Ka lunglen leh hrehawm tawrhte avangin I chungah lawmthu pawh ka sawi peih dawn em ni. Lo piang ta lo zawk ila tia ngaihtuahnate pawh a awm thin.
Mahse ka lawm e.
Leave a Reply