A Chang Chuan Nun Chhunzawm Bak Tihtheih Dang A Awm Lo

I thinlung a ngui.

I rilru a thlamuang thei lova I khawvel a chim dawnin I hria.

Enge dam awmzia? Hringnun hi ti khawpa hrehawm tur te chu dam chhunzawm pawhin lungngaihna bak kan hmachhawn leh dawn chuang em ni?

Hunin thinlung na a tidam thei an tia tunah chuan awih a harsa. Hunin I tan ni tha zawk a herchhuak leh ang an tia tunah chuan hma lamah eng pakhatmah hmuh tur a awm lo.

Nghahhlelh engmah a awm lova pawisak I nei tawh lo. Thinlung na hi tawrh zawh a harin a tha zawnga thil thlir a harsa.

Hun leh ni pawh chhiar lovin ngaihtuahna hi chhumin a zim mup mai.

Nun chhunzawm zel hi hringnun kan sual letna a ni.

Khawvelin dim lo takin harsatna tinrengin min tlakbuak a. Harsatna hi mitin chunga a thlen dan inang vek lo mahse mitin chunga thleng vek a ni. Hringnunin I chunga harsatna a hmachhawn tir che hi sual let lovin I pawm mai dawn em ni? I sual let tura a lo duan lawk reng a ni lo tih engtin nge I hriat? Harsatna hi chi tinrengin a rawn kal a, harsatna thenkhatte chu khat deuh mahse kan khawvel leh ngaihtuahna sawi nghing vek khawpin mi a thlak danglam thei. Harsatna sual leta tawrhchhuah hi mihring tichaktu a ni.

Mihring taksa chu thawklehkhata ral mai thei a ni tih I hriat kha. Tunah ngei hian hmun thenkhatah chuan an duh vang reng ni lovin an vanduai vanga hrehawm kara hnathawk, sala hralhte leh mamawh nei phak lova boral an awm reng. An dinhmun chungchangah tihtheih tlemte chauh an nei a, a tamzawk chu an damchhungin tawrhna an hmabak, nang erawh chu

I hmalam hun I hre lawk lo

I ngaihtuahna a thim a nih pawhin I damchhung a ni dawn lo. Harsatna chu hun a lo ralin engtin tin emaw tihdan a lo awm ve zel mai thin. Tunah harsatna hi hneh theih angin lang lo mahse I nun thlahthlam rih suh. Mahni I inenkawl a, hmalam hun tana beiseina sang tak neia I beidawn loh chhung chu engti khawpin nge I hmalam hun a tha zawngin a danglam theih I hre lawk lo.

Mahni chauha mal em em a inhriatna te, I hmangaih em em a boral avanga hringnun awmzia hriatthiam lohna a thlen changte hian I tihtheih awmchhun chu nun chhunzawm zel phawt hi a ni.

Thuchah: Hrehawm I tih rualin rei lutuk ngui hman I ni lo. Hunin a nghak lo che. He khawvel awm tirh ata mi tamtakin I dinhmun aia hrehawm zawk an sual chhuak tawh a, anni pawhin an tihtheih chuan I theih loh chhan tur a awm lo.

Nunna hi a hlu

I nun chhunzawm a ngai. I thlahthlam thei lo. I nun awmzia I hre lo a nih pawhin I dam chhunzawm zel phawt loh chuan I hre thei nang.

Tunah mahni chauha mal em em maia I inhriat chuan midang nangmah ang tamtak an awm ve tih hria la, hma I sawn zel chuan hun tha zawk a la herchhuak dawn. I hmangaih em em mai I hloh a nih chuan fam chang ta I hmangaih khan I dam chhunzawm zel a duhsak che I ring em? Amah avanga I nun I chan a duh angem? Duh dawn lo. I nun chhunzawm zela I hlim a duh.

Tun hi hun harsa a ni tih hriain. Thim chauh I hmuh pawhin a pawi lo. I rilruah engdang a lut thei lova hna pawh I thawk thei lo a nih pawhin a pawi chuang lo. I tah a chhuak a nih pawhin.

Engkimin a hun leh a hmun a nei a, tun atan chuan nun chhunzawm bak tihtheih dang a awm rih lo.

Nung la, hrehawm tuarchhuak rawh. A hma aia puitling zawk leh rilru khauh zawkah I chhuak ang.

Chhel takin awm ang che.
I thian,

Zakzum Hmeltha