Dum leh Var: I Computer leh Phone Singsa Fel Rawh

Dum leh Var

Enge Dum leh Var chu?
Mahni nun en a, a tul lo leh tangkai lo apiang tihral. Mamawh bak lo chu nun tihnufualtu mai a nih avangin Dum leh Var nundanah bungrua tangkaina neilo tan hmun a awm lo.

Dum leh Var nundan (lifestyle) chu hlawhtlin duhte nundan a ni. Nakina engkim nei turin tuna mahni neihsa zawng zawng kalsan ngam. Awmze nei lova nun hman duh lote leh mahni inhlangkai duhte nundan a ni.

I nun I enfiah chuan thil tul lo tamtak I hmu ang – thawmhnaw, bungrua, thiante, etc I nunah a khat tawka I thenfai loh chuan hnim a rawn thanglian anga, pangparte rawn dipin a par chhuak tur a khuhhliah zo ang. I nuna hnim leh hnawk tihfel chu I hna a ni.

I nuna I bungrua neihte I enchian chuan midang neih ang neih ve kan duh vangte, faknaa kan hmuh vangte, kan mi ngaihsanin an neih vangte, midang awhfik kan tum vangtein thil tul miah lo kan chhek khawm teuh a. Kan neih sa lah tihral phal bawk si lovin nakinah ka la mamawh takin tih zahzelin kan khawlkhawm zela, nakina hmanna chu a thleng ngai mang si lo.

Dum leh Var nundan hmasa ber atan kan neih thup leh a tel lova kan awm hleihtheih tawh loh computer leh phone kan enchiang ang.

I Computer leh Phone Singsa Fel Rawh

Computer leh phone hi kan nitin nunah a tel tawh avangin sawi hmaih theih a ni tawh lo.

I computer leh phone felfai taka I enkawl chuan I nun pawnlamah pawh I felfaiin I thil neih dangte I enkawl tha sawt ang.

Mahni thilneihte tifel tura hun bi neih a tha. Tihfel lohna a rei tawh phei chuan duh aia tam hun sen zek a awl.

Computer

Computer hnawk chu rilru hnawk a ni.

I computer I ON veleh hnawkin a lo hmuah nghal che chuanin I rilru hnawkin a khat. I thilhmuh ringawtin I ngaihtuahna thlengin a ti thawpik thei.

Hriat loh laiin computer-ah thil tamtak lo kawl teuh mai hi a awl em em mai a. Download sa a lo tlingkhawm a, hmun pakhatah mai ni lovin folder hrang hrangah a awm darh a. A hming atanga hriat theih mai loh program, a hla hming leh satu nena chhinchhiah loh hlate, software hlui maksak tak tak, document leh thlalak – I folder ching fel a hun tawh lutuk. Blue film/porn te khan hmun an awh zau duh a nia.

Heihi tuna ka desktop hman lai. Ka computer ka ON in a felfai a, a mawihnai a, a background thlalak pawh rilru tihahdam tur ka thlang (tlangpui) thin. Ka computer-a ka luhin ka ngaihtuahna chu hnawkin a pawtpeng ve lo, ka tihtur-ah chat rilru a innghat. Home Screen-ah a khat tawk lek pawha hnawk a awm tawh chuan rilru a nuam thei tak tak lo.

Computer Ching Fel Dan

1. File zawng zawng (chiang taka chhinchhiah thlap) Folder-a a awmna turah dah vek rawh. File inang pakhat aia tam a awm chuan Delete.
2. Software hman loh Delete vek rawh.
3. Startup atangin I mamawh loh disable rawh.
4. CCleaner bawlhhlawh chuangbang paih fai rawh.

Note: Windirstat hmangin I computer-a space luahlantu leh file size lendan a en theih.

Phone

Tunah remchan zawk avangin iphone ka hmang rih a, hemi hma hian hun rei tak chhung chu Android ka hmang reng thin a.

Android-ah a bikin file leh folder a tam chak khawp mai. Eng file pawh download a awlsam em avangin file hming hriat loh, apks, thlalak, hlate-in phone a hnawk duh hle.

Phone-ah nakin atana mamawh maithei apps I neih a tul lo, vawi 1 vawi 2 I hman tawk apps neih reng awmzia a awm lo. I homescreen hnawk em em mai tihfai pawh hi chindan tha tak a ni. 

I phone pawh a felfai, mawihnai leh hmuh nuamin dah la I rilru ti zalen rawh.

Phone Ching Fel Dan

1. Apps hman loh Delete vek rawh. I mamawh maitheia I hriat pawh neih reng awmzia a awm lo.
2. File leh Hla rem fel rawh. File hlui zawng a Delete vek theih.
3. Thlalak leh a neuh neuh backup fel rawh
   – I thlalak te online-ah dah tha la (Google Photos ka hmang), backup zawhah duh chuan a Delete theih.
   – I message te pawh backup that a pawimawh (software tithei a tam mai).

I Dawhkan Pawh

I computer leh phone I rem that rual khan I hnathawhna dawhkna singsa fel nghal rawh. I hnathawhna dawhkanah thlalak, bungrua dah teuh a ngai lo, I rilru la pengtu tur dah tur a ni lo.

Hnathawhna dawhkan chu hnathawhnan chiah hman tur. I hnathawhna hmun a hnawk chuan I rilruah I tihtur chauh awm tur a nih laiin thildangin I rilru a lo kuai peng.

Khaikhawmna

Computer leh Phone te hi hote angin hre mah ila nitina kan hman an nih avangin enkawl leh remthat a pawimawh. Mi inchhung, chenna in a fai thata remfel thlap a nih chuan an mizia a hriat theih angin I thil neihte pawh faifel takin enkawl tha rawh.

Thil pakhata chindan tha I neih tawh chuan thil dangah kha chindan tha kha hriat lohvin a lo inchhawm zel thin.

Dum leh Var nunkawng bul kan tan chauh a ni e.

I thian,

Zakzum Hmeltha