Hlawhtlin Dan: Thil Pakhat

Hun liam tawh hnu ka thlir letin inchhirna dawn dawn ka nei thin. Chu inchhirna chu ka hun leh tha ka khawhral zozai kha a ni.

Thil pakhat atangin a dangah ka pakai ka pakai a, ka thiltih lai zawhfel hmain thil dangin rilru a rawn la peng a. A tawpah chuan a engamah chu hlawhtlin si lovin thil tam deuh bul ka lo tan tawh thin a.

Vawi khata thil tam tih kual teuh hi a zavaia hlawhchhamna a ni.

Thil tam ti kual teuh lovin thil pakhatah ka thi leh thau zawng zawngin lo bei ila tunah hian khitah ka awm daih tawh ang, tiin ka dawn kir a. Hun tha a uihawm em a ni.

Vawi khatah thil ti teuh lovin Thil Pakhatah zel chauh lo focus ila ka hlawk daih zawk tur lo niin.

Rilru kuai pengtu a tam

Tunlaiah thil tamin kan rilru a pawtpeng a – Lehkha inti zir chungin phone leh social media-ah kan awm a, hnathawh laiin FB/Whatsapp lamah, mihring tak bula kan awm lai pawhin phone khawih kan thlang zawk a. Kan phi buai cheng laiin ni khat chu a lo ral leh ta mai thin a ni.

Kan rilru hmun tinah a awm a, engmah kan hlawhtlin thei ta lo a ni ber.

I rilru la pengtu a awmin I thiltih tum kha 100-ah-100 I pe thei lo. 100-ah-100 I pek loh chuan hlawhchham ta la tu thiam loh nge? I theihtawp I chhuah loh chuan midang tunge dem tur awm? A tawpa tuar tur chu midang ni lovin nangmah I ni.

Thil tih teuh hi hun khawhralna a nih mai bakah chin dan tha lo tak zirna a ni. I tih zel chuan nakinah he chin dan hi ngaiah I nei chho zel ang.

Kan tel ve lovang tih hlauhna

Mi tih ang zel kan tih ve loh chuanin kan tunlai lo bikin thil thleng kan hre lo bik ang tih kan hlau thin a. Mi tih apiang ti ve zel mi hlawhtling leh themthiam an vang khawp mai.

Mi tih ang tih ve zelin mahni hmasawnna atan hun a awm tawh lo.

Hlawhtling tur chuan thil pakhatah I rilru leh I hun pe rawh.

Hmun tina intheh darh aiin hmun khata theihtawp chhuah chu a let tam takin a hlawk zawk.

A ruala thil tam tak hlawhtlin thei anga I inhriat chuan I hre dik lo. I thei lo. Mi pangai chuan an thei lo (Ka thei emaw ka ti thin).

#Hlawhtlin Dan: Thil Pakhat

1) I Ni hman dan tur chu ruahman lawk rawh

I ni hman dan tur leh I thiltih tur a hma atangin lo duan lawk rawh.

Chhiar tur: Hlawhtlin Dan: Tih Tur List

2) Vawikhatah thil pakhat chiah ti rawh

Zing atangin I tih tur pawimawh ber atangin tan rawh.

I tih tur pawimawh ber a nih angin I tha leh zung senna ber tur a ni. I zawh meuh chuan dar engzah pawh ni rawh se, I ni chu ni hlawhtling a ni tawh.

Note: Hun I neih tlem chuan mi la mut thup laiin tho hma zir rawh.

3) Thil pakhat zawh hunah a dangah I insuan thei ang

Thil pawimawh tih tur a la awm laiin a awlsam leh nuam chu pumpelh rih rawh. A awl leh nuam chu I ti chak hmasa dawn, amaherawhchu chu tak chu a ni mi tam an hlawhtlin theih lohna chhan chu – a har leh manhla aiin kawng awl an thlan vang a ni.

I thil pawimawh tih tur a zawh hma chu thil dangah pakai suh.

Pakhat a zawh hunah a dangah I kai dawn nia.

Mi Ropui Nungchang

Ka lo upata mi ropui leh mi hlawhtling nun ka zir chiangin thil pakhat chiang tak maia ka hmuh chu hei hi – Thil pakhatah an tha leh zung an seng thin.

Tehkhinna: Thu ziaka eizawng an nih chuan an thuziah tur aia dah hmasak engmah an nei lo. An thuziah laiin tumahin an tibuai thei lova engmahin an rilru a la peng thei lo. An hun hlut zia an hria a, tihtur dang zawngin an thuziah zawh hun an nghak thin.

Hei hi hre reng rawh: I hun I khawhral mai mai chuan nakinah I la tuar dawn.

Tun atanga I nun I thlak danglam duh chuan thil pakhat chauh tih zir rawh.

A ruala thiltih teuhin kan hlawk zawk angin hre mah ila hun a lo reiah pakhat te tea thiltihin I kal thui zawk ang.

P.S. I dawhkanah emaw I hmuh theihna tur hmunah thil pakhat zel ti turin mahni inhriattirna tarlang rawh.