Hmai Bawl Enkawl Dan Tawite

Update: January 21, 2017

Thenkhatin hmai bawl (acne) tawrh hrehawm zia an hriat miah loh laiin thenkhat tan chuan hmai bawl a awm miah loh hi chuan amah ringawtin ni nuam tak a tling pha. Ka tleirawl laiin ka hmai ka enkawl ngai lova, ka hmai a bawl nasa bawk a. Pawn chhuah leh hmeichhe hmuh hlau khawpa bawl nasa thin a ni. Tun thleng pawh hian a khat tawkin ka hmai chu la bawl zeuh zeuh, mahse a ziaawm ta khawp mai.

Sawi tur tam tak a awm laiin ril leh thuk lutukin ka sawi dawn lo. A chhan chu engtikahmah post hi ka chhuah thei dawn lo.

Hmai – bawl leh bawl lo enkawl dan tawite I lo thlir ang.

Hmai Bawl Enkawl Dan

1) I hmai khawih suh.

I kut bal emaw eng hmang pawhin I hmai khawih suh. Lang lo mahse hmaiah bal a kai hma lutuk.

I hmaia bawlin khawih a ngeih lo bawk, hmai bawl a tizual mai mai.

2) Nitin hmai vawi hnih phih rawh. 

Zingah leh zanah.

Ka hmai phih dan:

1. Zingah chuan tui chauhin ka phih.
2. Zanah face cleanser nen ka phih thin.

3) Hmai phih zawhah hru hul suh. 

Towel-in emaw puana hru hul lovin nghak ro rawh. Anih loh pawhin I kut hmawr hmangin tih ro chauh tur. A chhan chu hmai hruk vak hi hmai tan a hraw lutuk.

4) Moisturizer leh Sunscreen hmang thin rawh. 

Heihi chu hmai bawl tan chauh ni lovin hmai enkawl dan tha a ni hrim hrim. I hmai tinung turin moisturizer hmang la pawna I chhuahin sunscreen hman tur.

Chutih rualin ni saa inphochhuah (rei lutuk lo) hi Vitamin D tha a ni a, hmai bawl a tanpui thei hlauh bawk.

5) Zan I mutin lukham sheet kha a fai hmang thin rawh. Anih loh pawhin kawr/towel fai.

Zan I mutin I hmai khan lukham a ngheng char char. I lukham sheet kha a balh chuan I hmai khan bal a ngheng char char tihna a ni.

Lukham sheet fai, kawr fai emaw towel faiin I lukham khuh thin rawh.

Hei hian ka hmai bawl a tanpui nasa hle

6) I chaw ei kha en uluk rawh. 

Thenkhat dairy – bawnghnute, cheese, butter, etc. ngeih lo an awm.

I chaw enfiah rawh. Bawnghnute I in thin chuan in tawh rih lo la engtin nge I hmai bawl a awm, a zia deuh em tih en rawh. Chutiang bawkin chaw thlai hnah hring ei hnem thung rawh.

7) Tui in teuh rawh. 

Mahni taksa mamawh zat tak tui in an tlem hle. Tui in teuh rawh, I taksain a mamawh.

8) Rilru hahin hmai bawl a tizual. 

Eng chiahin nge hmai a tihbawl dan chu hriat ni lo mahse a tizual thei tih chu hriat a ni.

I rilru hah chhawk zang turin chaw ei tha la, exer la tha la, mu tha rawh. Tichuan I hmai bawl pawh a ziaawm chho sawt ang.

9 (BONUS)) Hmai bawl pop dan

Ka pop dan – pop a hunah hriau zumin tlem ka chhun pawp a, tichuan hydrycolloid bandange in ka tuam leh thin. Bandage pangai chuan a hnai a lakchhuak theih loh avangin hydrocolloid bandage kher a ngai thin. Zan mut laiin tuam a remchang hle.

Hmai Enkawl Tura Product Ka Hman

1) Face Cleanser

Face cleanser ah hian hmai bawl tan bika face wash hman a tha.

‘Acne face wash’ inti kha.

‘Acne soap’ pawh a hman theih.

2) Mask 

Kar khatah vawi 1 face mask ka hmang bawk.

3) Salicylic Acid Acne Pads

A khat tawkin kar khatah vawi 2-3 vel salicylic acid (heihi hmai bawl tan a tha) acne pads mut hmain ka hmang zeuh zeuh. Pads pakhat hi ka mamawh bak a nih avangin a laiah ka phel a, a lehlam chiah ka hmang thin.

Tawpna

Mitin product ngeih a inang vek lo tih hriat tur. Mahse hmai enkawl dan tlangpui chu a inang.

Hmai tana product I hman reng rengin vawi khatah a thar lei teuh lovin mal te tea chhin phawt a tha. Kar 2 tal hman chhin phawt tur – tichuan I ngeih nge ngeih lo a hriat theih chauh ang.

Tunah chuan tawk rih rawh se.