Hmasawn Dan Tha Kawng 3

Mihring nih chu hmasawnna a ni. Hma I sawn reng loh chuan khawvelin a herliam san ang che. Mipa nih chu he khawvelin harsatna a vur che chhel tak leh huaisen taka hmachhawn ngam a ni. Dinhmun a harsat avanga tlawm mai loh.

Dik takah chuan I hringnun kawng a mam reng dawn lo, mi hausa leh hlawhtlingte pawh. A tha aiin a chhia a tam zawk. Mahse a chhiate atangin hlawkna leh inzirna thahnem tak a awm a, a chhiate hian a thate min hlut tir bawk a.

Ka nuna hma min sawn tirtu 3 ka tawmpui dawn che a, hote angin lang mahse ka nunah danglamna tha siamtu thenkhatte an ni. A kalhmangte zawm aiin zawm lo an tam dawn tih ka hria, mahse a zawmte chuan an nunah chi tha tak an tuh a ni.

Hmasawn Dan Tha Kawng 3:

1) Tui vawta inbual

Tui vawta inbual hi I rilru tichheltu tha tak a ni. Zing hma tawk taka tui vawta inbual thin mi chu mi naran a ni hauh lo. Mi thatchhia tui vawta inbual thin I hre ngai em? I hriat ka ring lo (tui luma inbual duhthlang thei an nih chuan).

Tui vawta inbual hlawkna thenkhat:

1. Rilru tichheltu a ni.
2. Rilru kaithotu tha tak a ni.
3. Vun leh sam-in a ngeih.
4. Taksa chau ti sawi zawitu tha tak a ni bawk.

A tirah tui vawtin I inbual nghal thei ngawt lo a nih chuan tui lumin inbual tan la, mahse tui vawta zawh ngei ngei tur. Tui vawta inbual chu inbual zawhah taksa a dai nuam a, tui luma inbual angin intihlum tumin I phi cheng lo bawk ang.

2) Mahni Insingsa Fel

Mahni invawng fel. I thawmhnaw leh bungrua a awm hnawk nuai em? I thil hman apiang nakina tihfel turin I dah thin em? Nakin atan khek lovin TUNAH tifel nghal rawh.

Bungrua dahfel nghal loh ngaiah I nei a nih chuan I inzirthar leh a ngai dawn (Ka inzir chawp leh angin).

I chaw eina thleng kha I hman zawhah sil nghal la, I inthlakin thawmhnaw kha thlep fel nghal la, I lehkhabu remfel rawh, etc. Hmun hnawkin rilru a tichep. I thawmhnaw, bungrua ching fel vek la, I computer a files leh folder thleng pawhin. Hmun felfai chu rilru engthawlna a ni e.

Mahni invawngfel hi chin dan tha tak a ni. Midangin nakin atan an khek anga mahse nang chu tuna tifel nghal turin inthunun lui rawh, nangma hmasawnna tur vek a ni e.

3) Mut That (Darkar 7+)

I taksa mamawh zat mut hi a pawimawh lutuk. I taksa nilengin hna a thawh hnuah hahchawlh, insiamthat a mamawh. Mut pawimawh zia I hre lo a nih chuan I rin aiin a pawimawh ang. Darkar 8 hi sawi mawi ber a ni a, darkar 7 aia tam chu a tha tawk ka ti (mihring mut mamawh zat a inang vek lo).

Mut I kham chuan I mood a tha a, I taksa a hahdam a, I rilru a fim a, I thiltih apiangah chakna thahrui I ngah zawk.

Mut that hi damdawi tha ber a ni. Mi thenkhatin mut ngaihsak lovin an nuna thildang an ngai pawimawh zawka, an tuar phah reng bawk – an mood a tha lo, an hrisel lo, an bula awm a hahthlak, etc. Mi tamtak (tum nei lo mite) chuan mut aiin Tv leh social media an thlang zawk a, a manhla lo lutuk. Mahni inhremna mai a ni.

Hriselna tluka pawimawh a awm lo. Exer tha la, chaw ei tha la, mu tha rawh.