Vawi engzahna nge ni tawh? Tunah chuan ka nun ka thlak tawh tak tak ang I tihna.
I ning tawh takzet. Ka inthlak tawh dawn vawi tam I tih hnuah pawh a ngaiah bawk I let leh thin.
Mahse tun chu a hma ang a ni tawh lo. Tun chu a danglam tawh dawn, vawi tam I ti tawh.
Eng emaw daltu che a awm. I hmelma lian ber. I hlawhtlinna atanga dang bet tlattu che.
Mi tam lutukin an hmelma tlansan an tum a. Rilru la peng tur apiang zawngin ar lu nei lo ang maiin an tlan kual sek reng a.
Nang chu I ni ve lo.
He hmelma hi I hmachhawn a ngai. Hun leh kum dang I khawhral leh duh a nih loh chuan.
Vawi tam I tlanchhe tawh a, khawiah nge a thlen che – khawiah mah.
He hmelma hi dik takin hmai chhanah hmachhawn rawh. Hlau miah lovin emaw khur dur dur chung pawhin.
I hmelma lian ber chu Nangmah.
I ropuina tur zawng zawng leh I duh engkim laka dangtu Nangmah.
Chhuanlam siam lovin inenfiah rawh. I tlin lohna lai te, insiamthat I mamawh lai, I thatna lai leh I thinlung duhzawng zawng zawng.
I tlin lohna lai chu hai der lo la I thatna lai pawh hlutna nei lo angin en liam mai suh.
Tun I dinhmuna thlentu che hi tuma thiam loh a ni lo. Nangma mawhphurhna vek a ni.
Nangmah chauhin hmun sangah emaw hmun hniamah a hruai thei che.
Enge I thlan dawn?
– Zakzum Hmeltha
Leave a Reply