Inchhung khura neih atana pawimawh tak mai chu darthlalang a ni.
Zing tin ka inphih fai phat atangin ka hmaa darthlalangah chuan ka inhmu nghal a. Ka hmelthatna leh ka chhiatna zawng zawng nen chiang takin min kap let a. Ka sam tan a ngai tawh tih hrilh ngai lovin keimahin ka hmu thei vek.
Note: Chiang taka inhmu thei turin eng (light) tha hnuaiah inen a tul.
Tichuan darthlalang hmaah chuan hmeichhe leng chhuak tur inuluk tak ang mai hian ka inen a, ka inbel chiang a, ka inhre thin. A chang leh ka nui der a, a chang leh hla ngaithla pah chuan mipui tam tak hmaa zai tur angin ka han insuangtuah vel a.
Ka taksa kim hmuh theih tur darthlalang lian tak a dang pakhat ka nei bawk a, pawn ka chhuah dawnin ka inen a, ka thawmhnaw hak ka inhmeh em, vawiin enge ka hmel a an tiin mi hmuh phak lovah ka inteh thin.
Darthlalang tangkaina
#1) Thian tha Darthlalang
Darthlalang chuan dawt a hrilh ngai lovang che. I chhiat chuan I chhiatna zawng nen a hmuh ang che.
I nihna a rawn chhun let leh mai a ni e.
#2) Mahni invawngfai (Grooming) hriattirna
Mahni invawngfai lo, hmel leh hmai a bik takin hnar hmul pawh enkawl lo hmuh tur an tam. Heihi midang mithmuha mawihnai lo tak a ni. A bik takin hmeichhia I nih phei chuan mipain hmeichhe hmel an chik lehzual tih hriat tur.
Hmeltha inti lo tan pawh mahni invawngfai a pawimawh.
#3) Mahnia inzirna
Mi hmaa I inpholan hmain nangmahin darthlalang hmaah I inzir lawk thei.
Mi hmaa thusawi emaw, lemchan emaw, I nuih dan te leh I tawng dan thleng pawhin I inzir lawk vek thei. A pui takzet ang che.
#4) Mahni inhriatchianna
I hmel fang zawng zawng, I taksa zaizir dan te chu chiang takin enfiah rawh.
Tun thleng I la dam a, eng ang chiahin nge I inhriat?
Darthlalanga inen duh lo
Darthlalanga inen duh lo leh inhmu duh lo an awm a, heihi a ruka mahni insitna a awm vang niin ka hria.
Mahni insita ka khah thin lai khan chiang taka darthlalanga inen ka nei ngai lo. Ka buaina tam tak chu hmuh ka duh loh avangin a awm lo niawm takin ka enliam thin.
Tunge ka nih pawh inhre awzawng lovin ka nihna ka haider a, mahni inenfiaha inhmachhawn ngam si lovin.
Mahni Hmasawnna
Darthlalang pawimawhna hi mi sawi ka hre ngai lova, mahse a pawimawh zia chiang takin ka hria.
Pawn lam mit atanga I inhmuh theih loh avangin darthlalangin a hmuh ang che.
Darthlalang hmaah inen thin la, I tlin lohna lai leh I siamthat mamawh lai te chu I hmu ang.
Inzir chiang la, Nangmah sel tu ni rawh.
I siamthat theih lai te chu siam tha turin hma la la, I siamthat theih loh thil avang erawh chuan buai duh suh. Ka hmai a bawl changa tih theih ka neih loh chuan ka en liam mai a ngai thin.
Hun liam tawh hnu thup bo tuma mawina tinreng,
Sawi ang belin Siamtu kutchhuak duhtawk lova,
Bum hmang kan lo chang leh thin hi
Mahse nang chu danglam ngai lo,
Thudik tantu I ni si a
– Darthlalang, Zirsangzela Hnamte
Leave a Reply