Ka Ngaihzawng Hmeltha 1

Ka dawhkana thuin ka ngaihtuah a, ani hi zanin chu ka rilruah a rawn lang tlat mai.

He thuziak hi ni danga ka thu ziah thin ang a ni lova, phaia lehkha zira ka awm laia ka thil tawn (experience) a ni.

– Zakzum Hmeltha

Thlalak hi a tak a ni lo. Google atangin.

Zan Khat Thilthu

Nidang ang bawkin gym-ah chuan ke ka pen lut a, workout turin ka inpuahchah nghal a. Zanin chu zan dang ang thova ni turah ka ngai a, mahse ka mit sir atang chuan nula hmel fai veng vawng hi ka hmu fuh a.

Hei hi chu zan dang ang a ni lo.

A sam dum sei angreng tak mai chu a tawn a, a leggings dum chuan a taksa hnuailam chu nghet takin a kuah bet tlat bawk a. He nu chu ka hmu ngai miah lo tia ka ngaihtuah rual chuan chhungril takah chuan kan inkarah eng vak a thlen pawh chu ka ring chuang lova.

Ka workout lai chuan mi pakhat lian tak mai hian a va bia tih ka hmu a, ka la hmelhriat loh ve ve an nih avang chuan an pahnih chuan inngaizawng turah ka ngai ngawt a. Engah vak ngai lo chuan ka thiltih lai chu ka chhunzawm san a. Zan ka haw dawn pawh chuan pawnah mipa dangin biak an lo tum ve leh tih ka hmu bawk a.

Kei erawh chu ralkhat atanga melh ringawt chuan zan thimah chuan ka hawsan a.

Chawlhni Zanah

Kar hnih hnua zan khat ka gym kal chu sam sei nula bawk chu ka hmu leh a.

Ka workout lai chuan ka hnunglam sir deuhah hian exer a lo la ve a, ka mit sir atang chuan ka lam chu a rawn en zeuh zeuh tih chiang takin ka hmu thei. Ka sawi tawh ang khan eng vak a thlen ka ring loh mai bakah ngaihzawng a nei ang tih rinna ruk ka neih avangin beiseina pawh a awm lo a ni ber e.

Chu zan ka haw tur chu gym chhuahna kawngka bulah chuan ani pawh chu haw tura lo inpuahchahin a kawrlum leh a scarf chu a lo ha vel mek a. Kawngka lam hawiin light hnuaiah chuan a ding a, hetah hian chiang takin a hmel chu ka hmu thei. A hmeltha ka tiin ka hmeichhe hmel duh chi tak a ni ngei mai.

Hetih hunlai hian amah ka la hriat chian loh vang nge pawh ka hre lo, hemi tum hi ka hmuh hmelthat ber tum a ni awm e. Khaw vawh em em lai November thla tawp a ni a, light hnuaiah chuan a lip balm chuan a hmui chu a tilang tle mawi hle a, a mitmeng leh a hmai fang atang chuan nula hmeltha tak a ni tih hai rual a ni lo. Mipa thenkhatin biak an lo tum pawh kha a lo awm ve reng.

Tichuan ani chu kalpelin kawngka lam chu ka pan a, mahse ka chhuak tur chu ka kawchhungah hian eng emawni hian min pawt tlat a nih chu. Ka lung chu a phu det det a, hlauhna leh chian lohnain ka khat a. Amah chu va be turin min tur ut ut a.

Kawngkaa chhuak ta lo chuan ka lehhawi a, ani nen chuan kan inhmachhawn ta der mai.

Kan inhlat dan chu pen thum vel lek a ni.

Inbiak Vawi Khatna

Tichuan hlau leh tim deuh tak chuan muangchuangin ka va hnaih a, enge ka sawi ang tiin ka rilru chu a phi buai cheng mai a. A hma chiah ka va thlen chuan harsa em emin “engtik niah nge I rawn kal thin?” ka ti chhuak thei hram a.

Ani chuan nelawm tak leh nui sang chung hian mi lo chhang a. A aw leh a mizia chu a nu ka ti hle mai. Nilenga lehkha zir hnua gym kal ka mamawh zia te ka sawi vel liam a, ani chuan a mamawh thu a lo sawi ve bawk a. Kan inbiak atanga minute thum vel lekah chuan sawi tur ka hre tawh der lo. Ka tihngaihna hre lo chu a hmaa la ding reng chung si chuan sir lam hawiin ka taksa chu ka her ta vel ringawt a. Chuti chung chuan ka bul atang chuan a la kalsan hauh lova. Mak chu ka ti ru hle a.

A lamah chuan inher lehin a sikul kalna te ka han ka han zawt a, tha tak hian mi lo chhang zel a. Kan lehkhazirna hmunte kan sawi a, ram dang atanga lehkha zira rawn kal a nih thu te min hrilh a. Tichuan a phone number pawh dil ngam si lo, mahse hmu leh chak si chuan “Engtikah nge I rawn kal leh dawn…” tiin ka han zawt kual vel a. “Tun atanga ni hnih, Thawhlehni hian dar 7 ah fitness class a awm thin a, tah chuan ka rawn kal ang” a ti a. “A nih chu” tiin pawnlama pawisak hmel loh deuh mahse a ruka pawisa angreng tak si chuan kan inthlah ta a. Amah hmu leh ngei tur chuan ka inpeih ru ran a.

Thawhlehni a rawn thleng a, dar 5:30 ah chuan gymah chuan ka lo awm fel der tawh a. Fitness class ka awm hman dawn loh avangin class tan hun dar 7 thlenga awm tur chuan ka inpuahchah a.

Ka nghakhlel lutuk chu sana ka han en thin a, muang chang hian a kal riai riai a.

Tichuan dar 7 a rawn rika class an tan chuan ani hmel hmuh tur chu a awm ve ta hauh lo.