Khawvela Hmanrua Tha Ber

Tui in turin sakawr lui khurah I hruai thei, mahse I insak thei lo.

Dawt leh thudiklo hrilh thei che ka ni lo. Dawt hrilh tur che chuanin sawrkar (government), sikul zirtirtute leh khawtlanga mi upate an awm alawm. An thusawi tamtak hi dawt a ni – a bikin vantlang hriata an thusawi.

He khawvela hmanrua tha ber, hlu em em mai chu – Internet.

Internet hmangin he website I rawn lut.

Internet hi he khawvela thuruk chu a ni lo, mahse I kawng thim chhun engtu a ni zawk.

Internet in he khawvel hi I tan kawng zau takin a hawn sak che. Tun anga hun tha hi a awm ngai lo.

I thiam chak chu I kuthmawr atangin I zawng chhuak thei. Mi tamtakin internet hi social media (Facebook, instagram, Youtube, etc) tan ringawt emaw an ti. A ni lo. Hun khawhralna atan ringawt a ni lo. Inzirna khawvelah a tluk ang a awm lo.

Engkim I duh I zawng thei a, a chhana a hmuhtir thei che. Zawhna engpawh I zawt thei.
Engtin nge bialnu ka neih theih ang? Engtin nge ka hmelthat sawt theih ang? Engtin nge inchei dan ka thiam theih ang? Engtin nge ka cher theih ang? Luphut engtin nge ka tihreh ang? Ka zakzum lutuk hi engtin nge ka tihreh ang?

Note: Internet a mi zilhna hi a tha leh tha lo hriat hrang ve a ngai. A lar apiang hi a tha ber kher lo.

Mahse (mahse a awm ve zel a ngai), hlawhtlinpui tur tak tak chuan nangmahin I hun leh tha I pek ve a ngai.

Hun – nuam tih loh chang a awm ang, harsat chang a awm dawn, beihdawn duh chang nen. Chu chu hringnun a ni. Thiltha nei tur chuan kawng awl a awm lo tlat. Doctor ni turin miin kum tel harsa takin an zir a, ni 3-4 chhunga thilthar bel taka thiam lo tum ngawt a ni thei lo.

Kawng awlsam (shortcut) zawng chhen lovin nitinin I thiam duh chu hunbi ruat zawk la. Hmaih miah suh ang che. A bik takin a tir a pawimawh – ngaia I neih hma chuan thulh suh. Chu chu hlawhtlinna kawng chu a ni.

Tehkhinna: Cher dan. Cher I duh chuan a bulpui berah chuan chaw ei tlem rawh. A bik takin a thlum tam (sugar leh carbs) lakah intifihlim rawh. Chumai bakah cher hma I duh chuan exercise la bawk rawh. Tlan thin la, pushups, situps, squats te pawh mahni inah a tih vek theih.

Chu chu kar khatah vawi 3-4 tal ti ziah la. Nepnawi leh chaw hrisel lo (junk food) ei nan kar khatah ni khat dah la (a zavaia ei loh tawp ai chuan a awlsam deuh).

Peih loh chang I nei dawn. Vawinni chiah chu ka han chawl teh ang I ti dawn. Tlemte chiah kan tem ang I ti dawn. Thlemna I sual chhuah a ngai dawn – a bik takin a tirah a pawimawh.

Hlawhtlin dan kawng awlsam:

1. Nitina hnathawh (engpawh lo ni se)
2. A harsatin bansan mai loh
3. Hlawhtlinna

Thil thenkhat chu I man hma anga, a then erawh chu I thiam har thung ang. A manhla apiang hi thiam a har thin.

Beidawng lova I beih zel chuan I la hlawhtling dawn. Tuna I lo thawhrim hi nakinah I la lawmphah zawk ang.