Rel ka chuanin lehkhabu chhiar an awm zeuh zeuh a, ka lo en thin a.
En chian chuan engang miin nge lehkhabu chhiar thin tih a lang chiang hle.
A hmasain an incheina enin a tlangpuiin suit a nih loh pawhin thawmhnaw tha pangai an inbel thin. Mi bawrchhawr leh mi dawngdah lehkhabu chhiar vawi khat mah ka la hmu lo.
Lehkha chhiar hi hlawhtlinna bulpui a ni.
1) I nun a thlak danglam thei.
Lehkha chhiar atangin rilru ngaihtuahna leh khawvel thlir dan thar a hmuh chhuah theih. Lehkhabu avanga kan nunphung tlem a lo danglamin tlem tlemin kan nun pumpui a lo danglam chho zel thin.
Kan hriat tawh angin chhunglam a inthlak chuan pawn lam pawh a inthlak ve thin.
2) Finna leh bengvarna a ni.
I tuizawng engpawh ni sela a chungchang chhiar tur a awm ngei ang. I tuizawng hriat belh leh hriat chian I duh chuan kawng dikah lehkhabuin a kaihruai ang che.
Mi hnen atangin nangmaha engtikawng maha I hmuhchhuah miah loh turte I zirchhuak ang.
3) Mi thiltih sual atangin a inzir theih.
Mi nun atangin a lo inzir theih.
Hun tam tak senga an buaina kha tihsual ngai ve tawh lovin hun hlu tak I hlep ang.
4) Vawi tam nunna a ni.
Vawikhat nung lovin vawi tam I nung thei. Mi mithmuh atangin khawvel thlirna a pe che.
Miin lehkhabu an ziaha an thil tawn leh an chungchang an ziah chhuah I lo chhiarin an hringnun I lo hmanpui. Mahni hringnun tê chauh ni lovin mi khawvel thlir dan leh an nun kan hre thei.
5) Hun hmanna tha a ni.
Tunlaiah lehkhabu chhiar an uar lo hle a, lehkha chhiar aiin phone khawih kan intih hmuh zawk a. Miin phone-ah engmah hmasawnna awm lo an tih tluk tluk laiin mi remhria chuan a aiah lehkhabu a chhiarin a ngaithla thin (audiobook).
Khaikhawmna
Zakzum Hmeltha I tlawh thin chuan mi pangai ai chuan lehkhabu I chhiar tam ka ring. Mi naran chhiar peih chi website a ni lo.
Miin an hun khawhral aiin lehkhabu chhiar se an fina hma an sawn tur zia chu. Ni khatah minute 30 lek chhiar pawhin kum khat a ral meuh chuan darkar 178 ah a tlingkhawm. Lehkha chhiarin I fing telh telh tih hre reng rawh.
Lekhabu pakhatin a man aia let 1000 chuang hlutna a pe thei. Tunlaiah phei chuan internet-ah lei kher ngai lovin chhiar tur a tam mai.
Relah khan let leh ila, mi awm thei chinin lehkha an chhiar a ni lo, mi bengvar leh inzir duh miin lehkha an chhiar a ni zawk.
Leave a Reply