Mahni Inthah I Duh Chuan Heihi Chhiar Rawh

I suangtuahna kha midang tam tak lo ngaihtuah ve tawh chiah a ni.

Nangpawhin a tha lo tih I hria…Khawvel leilung kal dan pangai a ni lo…Mahse tuna I dinhmun hi tawrh a harsa em a ni.

Mahni inthah hi khawtlangah sawi leh titi vak awm lo mahse mimal rilruah chuan a rawn thawh chang a awm fo. Tuna kan dinhmun bak thlir thiam a har thin.

Mi hlawhtling tamtakte hi thawkkhat lai chuan beidawnga mahni inthah duhna rilru pu ve thin an ni. Pawnah I bazaar a, tlangval hmeltha mahni invawng fai deuh I hmuh kha thawkkhat lai chuan a nunah thim bak a hmuh loh lai a awm asin.

Mahni inthah duhna rilru chiang tak I nei emaw chiang vak lova suangtuahna I nei a nih pawhin chhiar zel rawh. Ka dem dawn lo che. Lungchhe takin ti suh ka ti dawn lo. Miin an rilru an tihngheh tawh chuan keiin va tih danglam theih a ni lo. I tih dawn chuan I ti dawn a ni mai.

MAHSE chhiar zel la, dawn chiang phawt rawh. I la dawn chiang tawk lo a ni thei.

Tunah I nun I thlahthlam a nih pawhin nakin lawka thi tur tho tho kan ni a, hmanhmawh taka mahni nun phatsan ai chuan I hun tlemte neih chhun hi I duh duh tih nan I hmang duh zawk lo em ni?

Engpawh ni sela…

I chak em em vang pawh ni lovin he khawvel a hrehawm vang zawkin chhuahsan I thlang ta zawk a. Inthiamlo deuhin I nun I la ta…

I chhungte leh hmangaihte chunga thleng tur

I chhungte leh nangmah hmangaihtute chungah an damchhung atana hliam dam mai thei lo, taksa hliam aia tawrh hrehawm zawk I thlen. An khawvel kumkhuain a pangai tawh lovanga an hliam hi a khat tawkin ngunhnama vih angin a rawn thar leh thin ang.

Hmasial taka I nun I lak avangin an indem dawn tih hria ang che. I chunga an thiltih sual avangin an inthiam lovanga kohkir leh theih nise tiin I hnena ngaihdam dil an duh. Mihring nih chuan thiamlohna nei vek mah ila I boral avangin an thinlung chhungah inthiamlohna phurrit lian takin a uai bet reng.

Khawtlangah an mualpho. I chanchin sawi hrehawm an ti a, mi hmaa hmel tihlan hrehawm an ti, I hming lam rik ringawt pawh hi inhremna a ni. An mualphona tur chu pawisa lo mahla an rilru na chu I hmangaihte an nih chuan I pawisa ang.

Engti khawpin nge an thinlung leh taksa a nghawr dawn a hriat lawk loh – rilru hah, zan mut theih loh, chaw ei theih loh, he khawvel atanga bibo duhna leh mahni nun kalsan duhna hial khawpin a khawih thei. Thenkhat chu inhnemnaah zu leh drugs kutah an tlu lut a, a thenkhat chu an bula awm hrehawm khawpin an thinchhia.

An ui zia che, lo kir leh tura an duh zia che hmu thei la chuan I rilru I thlak mahna.

Mahse tunah chuan a tlai lua.

I duh I thlang a, nangmahin tuar tawh lo mahla I chhungte leh nangmah hmangaihtuten an tuar tawh thung ang.

Ka thianpa ruang bula amah hmangaih em emtu a nu leh pa leh a chhungte tap leh rum kha hmu ve se a inthah ka ring lo.

Chhungte leh Hmangaihtute I Nei Lo

Heihi chu a dan a danglam deuh. I nunna I lak pawha tumahin an pawisak dawn loh phawt chuan a pawina a awm lo – tia ka sawi I ring a mi?

He hmun I lo thleng a nih chuan ngaihtuahna tam I seng tawh tih ka hria. Hun reilotea theihnghilh leh mai tur ni mahla nun tihtawp mai chu I la duh bik chiah lo. Chian lohna chhete I nei. A dik, nun hi a hlu. Tunah hre rih lo mahla I nunna ngei pawh khan hlutna a nei.

Kaihruaitu che I nei lo pawh a ni thei. Thian I nei lo, mi hmuhsit, huat leh elrel I ni, I ngaihzawngin a bansan che, dam awmzia I hre tawh lo, I nunah TUMAHIN an ngaihsak lo che pawh a ni thei.

I tawrhna, I hrehawmna I sualchhuak thei a nih chuanin (I tithei) mi vantlang phak loh mi chhel tak I lo ni ang. Beidawn dawn tawpa chirh atanga I inhnukchhuak thei a nih ngat chuan hringnunin eng harsatna pawhin rawn deng che mahla tawrhchhuah zawh loh I nei lovang.

Lo ngaithla la,

Victor Frankl a chanchin tawite ka hrilh ang che

Victor Frankl-a hi Austria rama piangin naupan lai atanga fing leh talent ngah deuh mai a ni a. Neurology leh Psychiatry lamah specialize in ama clinic a hawng a – mahni inthah duh damlo ho hi a enkawl berte zinga mi an ni.

1938 khan Nazi hovin Austria ram an awp bet tan a. December 1941 ah nupui neiin September 1942-ah chuan a nupui leh a nu leh pate nen concentration campah thawn phei an ni a. Hetah hian nunrawng taka khung an ni.

Frankl-a hi concentration camp hran hranah dah a ni a. Concentration campa tangte chu mihring anga en an ni lova ramsa ang maia chhawr leh nghaisak an ni. Camp pakhat Auschwitz-ah phei chuan mi maktaduai khat (1 Million!) chuang an thi. Nitin mitthi an awm reng a, vawiina I bula mi kha I hmuh hnuhnung ber a ni lo ang tih pawh a sawi theih loh. A tanpui tam takte chuan duh duh huna sawisak reng nih ai chuan tiin mahni inthah an thlang zawk a. A bula mite beidawnga an tluk sup sup laiin Frankl-a chuan beiseina chhete a neih chhun chu vawng nghet tlatin a tuar hram hram a. Chu beiseina chhete a neih chhun chu a mitthlaa a nupui hmel – a nupui thla chu biain a bula awm ve reng angin a hre thin.

Kum 3 ngawt a tan hnuah chhuah a ni ta. A chhungte chanchin a hre chho – a nu leh pa leh a unaupa chu campah an boral. A hmangaih em em a nupui kha a boral bawk. Heti hi chuan mi tam tak chu an beidawng tawh ngei ang. A damchhuah chhan ber a boral takah chuan enge dam awmzia ni tawh? Frankl-a pawh a inzawhna lian ber a ni.

Frankl-a hmuhchhuah chu mihringin eng harsatna pawh tawkse damchhan a neih chuan engpawh a tuarchhuak thei a, kan rilru kan ngaihtuahna hi tuma min laksak theih a ni lo. Kan tuarna leh harsatnate hian awmzia an nei chawk.

Frankl-a hi a dam chhunzawm a, nupui fanau dang neiin chhungkua thar a din a. 1946 khan a lehkhabu Man’s Search for Meaning chu puangzar a ni.

Zakzum Hmeltha chanchin tawi

Rawn tleirawl chhohva thian hnai nei lo, mi kawm thiam lo, mi zakzum em em – ka thinlung chhunga ka vei TUMA hnenah ka phochhuak ngai lo. Ngaihzawng duh ve si be ngam bawk si lo. Midang nen ka inkhaikhin sek a, ka tlin lohna lai hlir ka hmu. Ngaihtuahna chu a kal thui duh ngei mai…

Khatih hunlai khan ka hmalamah beisei tur ka nei lo.

Khatih hunlai khan ka nun phatsan ta ila vawinnia keimah avanga an nun tlemte pawha hma lo sawn phahte hi engtin nge an awm ang, keimah avanga nula nui ri te, Nangmah, he thuziak chhiartu nen hian kan inpawh thei lovang.

Ka mal em em lai pawhin, ka kiangah tumah an awm loh lai leh min hrethiam tumah an awm pawha ka hriat loh laiin ka nun ka thlahthlam lova. Tun thleng hian ka la dam a, vawiinia ka nih ang hi ka ni thei ang tih ka ring phak ngai lo.

Hunin mi thlak danglam angin a thlak danglam lovang che tih a hriat loh.

Tanpuitu I nei lo a nih pawhin, thlawptu che I nei lo a nih pawhin mahni inring rawh. Kumkhua atana I thian tha ber I ni tih hriain mahni tha takin inenkawl la, I hlimna leh lawmna midangah nghat suh.

Harsatna, tawrhnate hi hringnun min ti hrechiang lehzualtu an ni a. Tawrhnate hi han sualchhuah meuh chuan min tichaktu an lo ni.

Inthah I duh takzet a nih chuan I tan rawtna tha deuh pahnih ka nei:

Kum 1 hun inpe rawh.
Mission.

1. Inthah I duh chuan kum 1 hun inpe rawh

Tunah intihlum lovin tun atanga kum 1 atan ruahman zawk rawh.

Tun atanga reiloteah I thi dawn tho tih I hriat avangin kawl phuarbettu che an awm tawh lo. A hmaa I hlauh thin khan I chungah ro an rel thei tawh lo. A hmaa I tihchak em em kha tuma phalna dil ngai lovin I umzui thei tawh thung.

Mi zakzum em em mai I nih chuan eng ang pawhin khawsain mi mak tih hial pawhin awm mahla I pawisa tawh lo. Miin nuihzatin deuhsawh che mahse I thih hunah chuan engmahin awmzia a nei tawh dawn lo tih I hria.

Enge I duh? – engpawh I tithei tawh.

Nula I duhin an hnar che pawhin I pawisa tawh lo. A dang an tam em mai. A hma anga hmeichhia zawkin an biak che nghak tawh lovin nangmahin I duh chu I umzui ngam tawh. I duh chuan inchhuahsan miah lovin I hun I hmang thei bawk. Hna I kal a ngai lo, sikul I kal a ngai lo. I duh leh rukru I ni thei (ka fuih lova che). Chaw ngheiin I tawngtai nileng thei. I duh leh mi lo I thloh fai sak vek thei.

I hmun tlawh chak em em ah kal bo daih rawh. Thingtlang mi tlemte chauh awmna hmunah chen I duh leh tunge hnar thei che?

I tan khawvel a inhawng. I ngaihtuah theih apiang chu I tithei. I thih hunah engmahin awmzia a nei tawh dawn loh avangin he khawvela I hun neih tlemte hi tuma tan nung lovin I tan nung rawh.

Kum 1 a lo ral meuh chuan inthah pawh I duh tawh lo maithei asin.

2. Mission – Tum I Nei

Nietzsche chuan damchhan nei chuan engpawh a tuarchhuak thei, a ti.

Dam chhunzawm I chak loh chhan chu tum I neih loh vang. Mission I nei lo.

Movie-ah a changtupain mission a nei a, a mission tihhlawhtlin tumin a hun, thiamna leh mawngkaw tha zawng zawng a sawm khawm thin. Movie kal laklawh laiin mahni intihlum daih se film dangdai tak a ni ang (a hmuhnawm phian maithei). A changtuin Mission a umzui laiin engdang mah a ngaihtuah lo, mahni inthah lam a ngaihtuah lo.

Lo inring rawh: Tun atangin I nun kha film a ni – a changtu ber chu Nangmah. Engtin nge I nun I hman dawn tak? Film entuten nghakhlel takin an thlir thup che a nia.

Tum I neih a pawimawh. Miin chumi khami chu ka tum a ni an tia an duh tak tak ni lovin midang sawi an sawichhawng ve mai mai chauh. I tum chu mi zakzum nih tawh loh pawh a ni thei, hnathawk sang chelh pawh a ni thei, fa 30 neih pawh a ni thei, infiamthiam mi ropui nih pawh a ni thei. I thinglung chhunga Nangma duh ngei kha a nih a pawimawh.

Tunah I mission I hre nghal lo a nih pawhin I dam chhunzawm zel phawt a ngai. Ka nunah thimin mi zim lai khan mission ka nei lo. Zawh I tum kawng thim pawh hi ngaihtuahnaah a rawn phe zuai zuai a mahse ka han nung zel phawt ang tiin chhel takin ka tuar. Kawng awl zawk kha lo thlang ta ila vawiinah he thuziak hi chhiar tur a awm lovang. Mahni insiamtha duh mahse kaihruaitu nei lote, rilru lunghnual leh thlarau chaklo, he khawvela hrehawma tuarte ka tanpui thei lovang. Ka tlin lohna leh harsatnate ka sualchhuah dan ka ziak thei lovang. Vawiinni thleng ka la dam avanga nunna pakhat chauh pawh ka chhanchhuah thei a nih chuan a hlu ka ti.

A Tawpna

Thuruk pakhat hrilh che ila mahni inthah I duh tawh ngai lovang tih chakawm viau mahse chutiang thuruk kan khawvelah hian a awm lo. He khawvela sum, hmeichhia leh hausakna chhiar sen loh neite pawh hian anmahni nun an la cheu. Thihna chu he khawvela thil pangai tak a nih angin khawvel hi a kal dan pangaiin a kal chhunzawm ang.

Ka thian, mahni inthah I duh chuan ka dang thei lo che. I kuta innghat a ni.

Hun harsaah hian nangmah I inenkawl that a pawimawh lehzual. Chaw ei tha la, exer la tha rawh. Thian kawm nuam bula awmte hian kan rilru chu a pawtkang duh a nia.

He khawvelah hian enge I duha enge I chak? Tuna I nun I lak mai chuan engtikah mah I duhzawng I hlawhtlin thei dawn lo. I dam chhunzawm zel chuan kum 30 nghah ngai pawh nise I la hlawhtlin thei thung. Tun hi nakin a ni lo. Tuarchhel hun a awm – Tun hi a ni.

Ka thinlung chhung atangin duhsakna sang ber ka hlan a che.

I thian,

Zakzum Hmeltha