Hmanni khan mi pakhat hang deuh nen kan inbia a, kan inbiak chhung zawngin a ha var tak maiin ka mit a la hle. Mi ha var siau hi chu langsar tak mai a ni.
Ha landan hi a pawimawh. Sumdawng mi leh hna sang thawk tan phei chuan a pawimawh lehzual. Research thenkhat chuan hmeichhiain ha tha leh chhia an en thin an ti a, ha var azirin miin an hnaah hna sang zawk tan an inbe rem thei an ti bawk. Ha tha leh varin kan inenkawl tha a kan hrisel tih a hril a, ha bal leh sen thup chuan a letling a hril thung. Ka ha a chhiat thin avangin tunah ha enkawl that pawimawh zia ka hria.
Mizo leh Ha
Mizo zingah kuhva ei an tam em avangin kuhva hi ha ti-hmelhemtu lian tak a ni. Ka chhung zawng zawng a tisen thup a, ha kar a dum bawk a. Kuhva bakah ha tibal leh tieng thei dangte chu – zial, sahdah, khaini, thingpui, coffee, soda, etc.
Hun rei tak ka zawng thin a, tuna ka rawn tarlan turte hi ha enkawl dan tha an ni. Mi tamzawk chuan hetiang hian an inenkawl uluk lo. Mahse I zawm chuan I ha a thain a var sawt ang.
Ha Enkawl Dan
1) Nitin I ha floss thin rawh.
Ha nawh pawhin ha inkarah thil tang a awm thin, chu chu I floss chhuah a ngai. Ha floss hi hahni tan a tha a, ha inkar atanga bal lakchhuah leh ka rimchhia pawh a tanpui.
Ha I floss ngai loh chuan I ha kar vel kha han floss chhin la, hnim rawh. A rim tui lo hle ang. I floss thin chuan a rim a chhe lovang.
Nitin vawi 1 floss ziah tur.
2) Nitin ha vawi 2 tal nawh ziah rawh.
Zing leh zanah.
Ha nawhin sec 30 chiah nawh tur a ni lo. Min 2 tal ha zawng zawng a zavaiin nawh kim vek tur. I nawh kim loh chuan a fai thei nang.
Ha nawh dan dik:
- A sir zawng ni lovin a bialin nawt rawh (circle).
- Chaw ei kham veleh nawt suh. Min 30 vel nghak phawt rawh.
- I nawh zawhah I lei nawt tel rawh.
- Thla 3 hnuah I toothbrush thlak a hun.
Mahnia Ha Tihvar Dan
Mahnia ha tihvar chu doctor hnena tihvar tir nen a inang lo. Vawi leh khatah a var nghal dawn lo, muang changin a thawk. Mahse ha tihvar tir aiin a tlawm zawk a, doctor hnena ha tihvar pawh a rawng a rawn da leh tho thin avangin mahnia tihvar leh enkawl hi tih dan tha a ni hrim hrim.
1) Meihawlin I ha nawt rawh. Heihi activated charcoal an ti.
Meihawla ha nawh hi hmanlai atanga ha an lo tihvar thin dan a ni.
I toothbrush-ah meihawl tlem dah la minute (min) 2-3 vel I ha nawt chhuak rawh.
2) Ha tihvarna toothpaste hmangin I ha nawt rawh.
Meihawla I nawh zawh veleh ha tihvarna (teeth whitening) toothpaste hmangin I ha min 2 vel nawt leh rawh.
Hriattur: Meihawl leh ha tihvarna toothpaste hi a thawk lo tia I bansan hmain ni 30 tal nawt hmasa rawh.
3) Coconut Oil Oil-Pulling.
Ha tihvarna leh taksa tana thatna tam tak nia an sawi chu oil pulling.
Oil pulling an tih hi min 10-15 chhung coconut oil fian khat vel I hmuam anga, I ka chhungah I thuah kual ang.
Hei hi tunah ka ti mek.
Tawpna
Ha I enkawl that mai bakah a theih changin chewing gum thial pawh hi a tha. Tho rimtui lo tur a veng. Tumah tho rimchhia bula awm duh an awm lo.
I ha hi I neih chhun, damchhunga I hman tur an nih avangin tha takin enkawl rawh.
Leave a Reply