Kum 4 vel kalta khan Youtube lamah mahnia lu meh dan video ka hmu fuh hlauh mai a, a harsat hmel loh bawka dawr ka pan lawk a, lu mehna khawl set thar vervawr ka lei nghal a. Tun thleng hian a chang zeuh zeuh tih mai loh chuan ka hawikir leh tawh lo.
Mahnia Lu Meh Hlawkna
1) Hun khawhral lohna
Lu met turin dawrah I kal a ngai a, dawrah mi an tam phei chuan nghah leh te te a la ngai cheu. Hun hlu khawhralna neuh neuh a tam lutuk. Ka duh dan anga met thiam ber a lo awm loh phei chuan ka hawsan leh nghal thin. Mahnia lu meh chuan heng nepnawi zawng zawng hi a pumpelh vek theih.
2) Rosum khawlna
Ka lu meh tir thin lai chuan cheng 10 vel a ni a (12 ka pe thin), kar 3 dan velah let lehin. Kum 1 chhung ringawtin cheng 200 chuang ka khawl phah a, hun a lo reiin ka sum save a tam tial tial.
3) Thil thar zirna tha tak
Hun leh sum I save mai bakah thiamna tangkai leh tha em em mai a ni.
Mahnia lu meh hi a hlawk mai bakah hmanrua I mamawh tam lo hle. Hmanrua 2 chiah I mamawh:
1) Lu mehna khawl leh guard
Lu mehna khawl I lei chuan a set-in a khawl, guard, samkhuih leh neuh neuh dang a chhawm deuh vek ang. A to leh tha ber I mamawh kher lo, professional dawr lu mehna tur a ni lova a man awm ang deuh hlek kha a tha tawk.
2) Darthlalang
Darthlalang 1 tal neih a tha. A hnung lam I hmuh duh chuan 2. A tirah phei chuan a hnung lampang hi a harsa deuh ber lai a nih avangin 2 neih a tangkai hle. A hnung lam I tihtheih loh chuan ti turin midang sawm mai rawh.
Lu Meh Dan Video
A meh dan video awlsam tak tak 2 ka tarlang a. Youtube lamah a dang tam tak pawh hmuh tur a awm teuh. I duh ber leh I duh dan style kha zawng mai rawh.
Video ang chiah chiaha I meh loh pawhin a chhuak ziaawm tho ang. Dawra meh a ni lo tih an hre hlawm dawn lo (khawi dawrah nge ka meh tir thin tih zawhna ka dawng fo).
Mahnia meh tirhin a rawn chhuah maksak deuh hlek chang pawh a awm thin. Sam chu a to leh tho tho, reiloteah a rawn sei leh mai ang. Inzirna vek a nih avangin hun reilote chhung sam dangdai deuh I pu a nih pawhin ngaimawh duh suh.
___________________________
Hun a lo ral zelin I thil thiamna hian hlawkna kawng tam takah a thlen ang che.
Leave a Reply