Mipa Tan Hmelthat Dan – Part 3 Mizia leh Thiamna

Part 3 – Mizia leh Thiamna

Topic:
1. Mizia
2. Thiamna

Mizia

An hmaifang chu hmeltha tia han sawi tur chu an ni lo. Mahse an mizia leh huhang avangin hmeltha tia kan koh fo an awm. Hmeichhe thenkhat chuan “pa” an ti bawk.

Zawhna zawh zing ber te zinga mi:

Q: Engang mipa nge hmeichhia in an duh?
A: A chhana tam ber chu mipa confi, mi inringtawk tih hi a ni bawk.

Confidence – mahni inringtawkna.

Mi inringtawk tak bulah chuan mi an thlamuang thin. Miin hnaih an duh. A hmei leh a pa, engatinge tih chuan mi tamzawk hi mi inringtawk an ni lo hlawm. Kaihruaitu tur an mamawh. Chutih rualin mi thenkhat mi inringtawk deuh lo sit tawk pawh an awm fo thin.

Mi inringtawk tak hi chu a rukin kan ngaisang hle. An inrin dan em em hi. Midangin selin rel mahse an thusawiin a tisawn eih lo reng reng.

Mi ngaihdan leh titi ho mai mai lak thutak tur a ni lo. Tihtur pawimawh an neih loh em avang leh an nunah hlimna tak an tlakchham em vang a ni.

Mahni inringtawkna hi mipa tan chuan thil hlu tak a ni. Tunah inringtawk lo mahla a inzir chawp theih (kei angin).

Midang tumahin ring lo che mah la. Nangmah tal I inrin a ngai. I hlawhtlin hnuah midangin an ring ve leh chauh ang che.

Din Dan Dik

Din dan, taksa hawi her atangin mi confi a hriat theih. Mahni inringtawk lo mi a hriat chian theih em em bawk.

Thuruk: Inringtawk rih lo mah la ngil taka din leh hawi her zir la, tilui rawh. A tirah chuan a pangai lo viau I tithei, I tih chhunzawm zel chuan ngaiah I nei chho mai ang.

Kalkawnga kala hnuai lam en char char mi hi mi confi tak an ni ngai lo. Ngil takin kal la, hawi chhuak rawh. Mi inringtawk lo tak mi chu rukruk leh suam an awl zawk bawk.

Kan taksa puthmang leh kan ngaihtuahna hi a inpawh thuk em avangin I taksa zaizir vengthawng la, I taksa awmdan azirin I rilru puthmang a ti confi in a ti zakzum thei.

Mahni Inringtawk Pawimawhna

Mahni inringtawk lohna chhan lian tak mai chu midang nen kan intehkhin reng mai hi.

Midang nena intehkhin reng hi hnungtawlhna a ni. Facebook, Instagram, milar hote nen I intehkhin phei chuan I chak thei lovang. Mi reng rengin social media a an nun an post hi a tha lai chauh ani an post. Chuvang chuan mi nuna a tha lai nen chauh I intehkhin chuan I chak thei lo.

Tehkhinna: Youtube a inkhel thiam highlights. Highlights chu an chetthat lai reilote chiah dahkhawm a ni a. Inkhelh takah an highlights ang tluka thiam TUMAH an awm lo. Messi/Ronaldo pawh ni se. Chu chu mi nun nen I intehkhinna ang vel tho kha a ni.

Midang nen intehkhin lovin I intehkhin tur chu ka hrilh ang che. Nangmah. Aw, Nangmah nen intehkhin rawh.

Nikum aiin hma I sawn em tih en let rawh. Kumtin hma I sawn a ngai. Hma I sawn loh chuan kum 1 chu I hmang thlawn der mai.

Kum tin hmasawn turin hmasawnna kawng chu mahni a I zawh ngam a ngai. Midangin hmasawn, mahni inenkawl peih lovin kawng awl apiang thlang mahse I ti ve thei tawh lo.

I bula mite kha en la, anmahni ang nih I duh chuan an tih ang ti ve zel rawh. I thian kawmte leh I hun hmanpui te angah chiah I chhuak ve ang. Engmah ti lova hun I khawhral chuanin hunin a khawhral ve ang che.

Midangin I kalkawng zawhpui lo che mahse mahni inringtawk (inringtawk lo pawhin) I zawh a ngai.

Mahni inringtawkna huhang, hmeichhia in an duh deuh mai chu midang tumah I mamawh lo a ni tih huhang. Midang mamawhna leh ngaihna rilru I put reng chuan pawnlangah midang hmuh turin a rawn langchhuak anga ngaih pawimawh I ni lovang. Mihring mizia pakhat chu kan thil neih theih mai loh hi awlsam taka kan neih theih ai fe chuan kan hlut zawk.

Kawng engpawh thlang la a tawpah chuan nangmah chiah I ni tho tho. Mimal pakhat te chiah. 

Kawng Hrang Hranga Mahni Inringtawk Dan

Mahni inringtawk dan:

1. I hlauh em em thil I hlen duh thlang la
2. Hlau chung chungin hlen rawh
3. Tichhunzawm zel rawh – ngaia I neih hma chuan

Mi biangbiak a ni thei, nula hmeltha I tih biak a ni thei, mipui hmaa tawng chhuah a ni thei, mahni chiaha bazaar a ni thei. Engpawh ni se, I hlauh em em hlauh I duh tawh lo thlang rawh. Nangma tan vek a ni.

Hun a lo rei chuan I tih zin tawh em avangin hemi kawngah hian I lo confi phah ang.

Mahni inringtawk (confi) tak te hi mi hmeltha an ni.

Huaisenna chu hlau leh hreh chung chunga tihtur hlen hi a ni.

THIAMNA

Hmelthatna huang chu kan tlawlh thui tawh angreng hle mai a. Thiamna ka telh chhan hi chu mihring nih chuan hmasawn zel a ngaih vang a ni. I kum a lo upatin I hmelthatna a chuai anga thiam I neih loh chuan engtham I ni dawn lo. Hmelah ringawt I innghat thei lo.

An hmel tha lo mahse bel em em maia thil an thiam chuan kan hmu hmeltha thin.

Hmeltha lutuk lem lo, mahse zaithiam deuh mai te. Music hnehsawh tak. Inkhelh thiam tak te. Lem ziah thiam tak te. A dang pawh a tam mai. Mi themthiam tak chu mi hmeltha an ni.

Khawvela mi thiam ber te chu kan ngaisang. Music, sports, film, etc. An themthiam viau chuan an hmelthat vak loh pawhin an hmelthatna lai kan hmu langsar bik thin.

Khawvel puma kan hriat larte hi, a ‘Ber’ ni tur chuan hun leh tha, darkar tamtak sengin an inzir ve tho. An pian tirh ata thiam nghal ngawt an ni bik lo. Mi pangai chuan an hlawhtlinna chauh hmuin an ngaisang em em ve ringawt a, mihring ve tho, inzir chawp ve tho an ni tih hriat a pawimawh.

Nangpawh, midang aia I chungchuangna, thil thiam em em mai pakhat tal hi chu I nei tur a ni. Mipa nih chuan thiam neih a pawimawh. Mi naran ang mai maia nih lungawi suh.

Thil hnehsawh tur chuan Tha + Hun a mamawh. Midang angin hun I khawhral mai mai chuan anni aiin I chungchuang zawk thei lovang.

Hun: Hun hi a pawimawh lutuk, engtikah mah I kokir thei tawh dawn lo. Website ho mai mai, texting, Fb, Youtube leh a nepnawi vel mai maia nitin darkar tam I khawhral kha hma I sawn phah lo. Kha hun I khawhral zozai kha I chan kumkhua bawk.

Thiamna Tehkhinna:

1. Inkhelh lam sports
2. Musical instrument
3. Tawng hran thiam
4. Fitness – bodybuilding, martial arts, etc
5. Technology – programming, website siam, etc

Tui bik tak I neih loh chuan tikual vek rawh. I thinlung duhzawng tak I hmuh hma chu. Mahse bansan hma lutuk lo la, a rah tlemte tal I seng hma chuan I tui tak tak leh tui loh I hre hman lovang.

Thil thenkhat chu tlem a zawng thiam kual chu a tha. Mahse I chungchuanna ber ni turin I thiam (ber) pakhat chu bei fan fan rawh. A ‘Ber’ ni turin.

Khaikhawmna

Engpawh ti la, midang tihlawm leh fak turin ti suh.

Midangin min fak se, min chawimawi se, min awt se, ka chungchang titi se, tih ngaihtuahna paihbo vek rawh. Midang tana nun chu nakinah hlim lohna leh kim lohna thlentu a ni. Nangma tan vek ti zawk rawh.

Vawi tamtak kan sawi tawh, hmasawnna kalkawng hi kawng awl a ni lo. A manhla thung.

Post Dang Inang:

Part 1 – Hmai leh Inchei
Part 2 – Hriselna