Ngaihzawng Nena Inthen (Breakup) Tawrh Dan

Ngaihzawng (tha) neih hi nuam deuh mai a nia.

Kan tihtheihloh leh kan tihngam lohva kan ngaihte pawh hi ngaihzawng bulah chuan intipachangin kan ti thuai mai zel a. Mihring dang kan hnaih berte zinga mi an ni a, kan thinlung an luah khatin kan pahnih hmalam hun tur pawh lo suangtuah lawk chang a tam.

Mahse thil tha apiang chu tawp hun a awm an tih kha.

Inthen chhan leh vang chu kan tlawh kual lovang.
I ngaihzawng nen in inthen, awm ngaihna I hre lo, mihring leh a thlah zawng zawng tihchimit vek I duh. Hun rei tak chhung in inngaihzawn hmana I lo inpumpek hman viau phei chuan tawrh a harsa lehzual dawn. Inthen avanga mahni inthat pawh sawi tur an tlachham lo.

Inthen hlimchhawn hi tawrh a har – khawvel a thim ruih a, rilru a thlaphang, thinlung a ngui, lunglen a na, thinrimna leh chian lohnain kan khat nuk a. Engmah ti turin a phur theih meuh loh.

Ka thian pakhat a nupui tura a hual lawk nen an inthen tuar na lutuk chu kum tel dawn a tuar a. Ka rilruin ka lo thik lek lek – hetianga rilru na hi tuar ve ila mahni rilru tihchaktu leh breakup natzia hriatthiamna atan a tha dawn asin ka ti rilru a, ka chunga a thleng ve chiah chu a nuihzatthlak loh khawp mai.

Rilru a phawklekin thil nih dan awmze nei taka thlir thiam a har avangin tunah chiang zawkin kan enfiah ang.

Ngaihzawng nena inthen (breakup) tawrh dan kawng 8.

1) I tana Khuanu ruat a ni lo.

I tana Khuanu ruat (soulmate) anga I ngaih tlat chuan thlah a harsa anga I thinlung a dam har viau ang. He khawvelah I tan Khuanu ruat lo awm tehreng pawh nise tuna mi hi chu a ni lo. I tana Khuanu ruat nise chu in inthen tawp lovang. In inthen chhan a awm a, chu chhan chu engpawh nise in inkarah inremlohna a awm tihna a ni mai. I tana Khuanu ruat nen chuan inremlohna a awm dawn em ni?

2) Be tawh suh.

Va biak chakna I nei a nih pawhin insum a tha. “I tha em?” – text/phone/engmah I va tih a ngai lo. Thian in ni lo, thian inkawmngeih ang posi a va biak a tul lo.

Nangman I va biak a lo beisei laia I ngawih tlat chuan a inngaihtuah nasa ve viau ang.  A rawn biak hmasak che pawhin chhan loh a tha (hrehawm a ti dawn). I rilru a nat thu hrilh a ngai lo. I chungchang sawi a ngai lo. Ama chungchang sawi a ngai lo. I va biak khan I thinlung a dam har mai mai. I tawrhna leh I thinlung natna a hriatthiampui lo che. A rukin be chak viau mahla I thinlung a dam hma chu be tawh rih suh. Nakinah thian satliah in la ni mahna, chumi hma chuan biak a ngai lo.

3) Social media atangin delete rawh.

Heihi a pawimawh.  Social media – Facebook, Instagram, Whatsapp, Snapchat, etc.  ah inhmuh theihna a tam em avangin delete/block vek rawh. A tangkaina pakhatmah a awm lo.

Thlalak thar a post em? Kan thlalak hlui a delete em? I rilru I tihah duh a nih loh chuan delete vek la hawi kir suh.

Kan inthen hlimin ka di hlui hmeltha tak mai thlalak en turin a account ah ka kal thin a, mi ti thik turin thlalak tharte a lo dah ve bawk a. Thlalak ka hmuhin thinlaiah lunglen thar leh thin mahse nitin deuh thaw mai ka en lo thei lo. Mahni inhremna drugs chi khat a ni. Thlalakte rilruah a cham a, tuar a ti harsa lehzual takzet. Hun tamtak ka khawhral phah bawk.

4) Hla tilunglengtu che ngaihthla tawh suh. Bungraw hlui pawh dah bo rawh.

Hlain mi rilru kuai theihna a nei a, hla hlimin rilru a chawk tho ang thovin hla ngui deuhin I rilru a tilunghnur thung ang.

He hun hi a na lo thei ang bera paltlang I duh a nih chuan hla lunglen thlak deuh kha chu nidang atan dah tha rawh.

Chutiang bawkin bungraw hlui, tlereuh, engpawh I ngaih tizualtu chu hmuh theih lovah dah tha rawh. I duh leh paih la, I duh leh nakina I hman leh atan dah tha la, I duh leh midang pe la, I duh leh ngaihzawng thar I pek tur atan kawl tha rawh.

5) Hun engemaw chen chu I lungchhe dawn.

Ni 20 chhung chu I ngui anga I tha leh mai ang tih tur hunbi thliah a awm lo. Mitin tan damna hun a inang lo, hun erawh chuan a tidam theuh thung.

I lungchhia anga I lungleng viau maithei. Chaw ei theih loh leh mut that loh pawh I nei chawk maithei. I thiltih laklawh laiin I rilruin hmanlai a lo fang leh thin ang. Tuna I thinlung nat dan em em hi engtin nge midangin an lo tawrhchhuah theih zawk te pawh I ti hial maithei.

Engmah I tithei rih lova hun I khawhral mai mai a nih pawhin tunah chuan I inngaihdam a ngai.

Tun I dinhmunah awih har viau mahse hun a liam anga I lo ziaawm chho ve zel ang.

6) I rilru la pengtu tur zawng rawh.

Mahni a tuar tluk tluk lovin thiante nena inkawm, I tuizawng infiamna (sports) khelh, thil thar zirte hian rilru a pawtpeng a (a khat tawkin a lo la bibo tho!).

Engmah ti lova kun ngui reng ai chuan hmundanga zinbo daih te hian rilru chu a lapeng. Exer lak – gym a kal, pawna tlan, etc. pawimawh lai tak a ni bawk. I rilru la peng turin hmeichhe dang I biak teuh a ngai a nih chuan chu chu ti rawh. A bulpui berah chuan midangin I chhungril an hriatpui loh che avangin nangmaha hma I lak a ngai.

7) Lengdang an tam.

Hmeichhe dang tam tak an awm. Ani aia fel, hmeltha, piannalh, rawngbawl thiam zawk. I awih lo a nih chuan I khawvel chettlatna hmun zimte atangin hmun dangah kal la hmeichhe dang I hmu teuh ang. Internet atang pawhin a hriat. Hmun tinah mihring an awm a, ngaihzawn sen loh hmeichhia an awm.

Mipa mahni inenkawl tha, hlutna nei sang I nih chuan kawppui tur I tlachham lovang. Hmeichhe duhzawng mipa hlutna nei sang an tam lo hle.

Ngaihzawng thar a hma aia tha I neih chuan I di hlui chu I theihnghilh vat ang.

8) Phuba la rawh.

Mi awm lohna kawng kawiah infair fight turin lo cho rawh ka tihna a ni lo.

I hmangaihin a then che a, mi tlaktlai lo taka I inngaihna hi malsawmna letling a ni thei. I thlir dan azirin – 1) He I kawchhunga thinrimna inchhek khawl hi mahni insiamthatna atan I hmang thei a, 2) Mi dawihzep ngai awh thei tawh lovah I chan phah thei bawk. Kei ka thlan tur zawk ka hria.

I tawrhna hi I ex laka phuba laknan hmang rawh – Hlawhtlin hi phuba tha ber a ni.

Inpawt tho la, mahni insiamthatnan leh hlawhtlin nan I hun leh I tha zawng zawng hmang rawh. I ex ngaihzawng dang tehkhin phak rual loh turin, nakina I ex la inchhir tur khawpin. I insawitheiha a hmuh tura I intihvei a ngai lo, aman a hre mai ang.

————————————————

I chunga thilthleng hi mahni inenchian nan hmang la, in inngaihzawn lai khan enge I tih dik loh – I thil tum thlahthlamin a tan engkim I tihsak em? Nangmah aiin I dah hmasa em? A thusawi apiang zawmin a thuhnuaiah I awm em? Mahni indah hmasak a pawimawh. Mipa leh hmeichhia inkarah mipa chu hruaitu zawk an nih avangin I bialnu nang aiin I dah lal thei lo. Ngaihzawng I nei leh a nih chuan mipa angin I khawsa tawh ang.

Hun harsain mi chak a chherchhuak thin a. He hun hi I duhtak mihringa inchherchhuak turin hriattirnaah ngai rawh. I thil tawn avang hian I rilru a chak phah dawn tih hria la, I hlawhchham a ni lo, I inzir mai chauh a ni e.

He khawvela an hmangaih berte’n an kalsan avanga ngai awh thei tawh reng reng lo an awm a. Nang erawh chu ngai I awh dawn lo, I nih phak ngai lovah I inchherchhuak dawn!