Putar Pakhat Sakawr leh A Fapa [Chinese Thawnthu]

Tun bak hi thlir thiam a har thin.

Nakinah enge lo la thleng dawn tunge sawi thei?

Chinese Thufing tarlan ang hian.

Thawnthu intan………………

Hman lai hian pa pakhat kum upa tawh ngilnei deuh mai hi China ramah a awm a. He khawvela a hlut ber pahnih chu sakawr tha-chi vulh leh a hmangaih em em a fapa an ni.

Chu putar leh a fapa chuan nitinin sakawrte chu an chungchuangin hmun hla takah te an kalpui thin a, sakawrte inthlengin, mi tharte tawkin, hringnun nuam ti takin an hmang a.

Tuk khat chu chhiahhlawh pakhatin sakawr dahna kawngka a khar theihnghilh a, chu putar sakawr pa ngainat ber chu a chhuak hlauh mai a. Thuthang hriain an thenawmte chuan chu putar chu thlamuan tumin a vanduai zia an hrilh luam luam a.

Mak tak maiin chu putar chu a lungni lo miah lo. Vanduaina a ni kher lo tiin a hrilh a. Sakawr chu a tlan chhuak dawn tih an hre lawk miau lova, tunah chuan engmah tihtheih a awm tawh loh avangin a nih dan chu a ni mai tiin “Lungawi lohna tur a awm lo” a ti mai a. Thenawmte chuan sakawr hruai kir turin tihtheih an nei lo tih an hria a, chu putar vanduaina pawh chu lo tuarpui tur a ni lo tih an hre thuai a.

Kar khat hnuah chu sakawr pa chu a rawn let leh a. Sakawr nu hi a rawn hruai tel a. Sakawr nu naran ni lovin a vang chi leh var vek mai hi a ni lehnghal a. An thenawmte chuan a vanneih thu an hriatin lawmpui thu an va hrilh a. Mahse chu putar chu a hlim em em chuang lo. A hmaa a sawi ang bawkin vanneih vang a ni vek chuang lo a rawn kir leh mai a ni. Hlim em em nachhan tur a awm lo a tih chuan mak ti angreng takin a thenawmte chu an kir leh a.

A hnu reiloteah a fapain chu sakawr var chu a chuan laiin sakawr chu a tawlh hlauh a, a tlu ta a. A fapa ke chungah chuan a tlu a, a ke chu a tihtliah sak a, kumkhua atan ke bai tawh turin. Thenawmte chu vanduaina avangin an va kal leh a. An zinga pakhat chuan sakawr var chu vanduaina dang a thlen leh hmain hralh vat turin a fuih a, thenkhat erawh chuan phuba lain that turin an ti thung a. Chu putar chuan a enga mah zawka chu a ti lo. An hnenah chuan a fapa chu pawi tihpui lo tur leh sakawr chunga thinur tur a nih loh thu a sawi a. Chetsual palh sawi lawk theih loh thil thleng a ni a, tumahin thil thleng tawh an thlak theih tawh loh thu a sawi a. Heta chinah chuan a thenawmte chuan a â taah ngaiin an kalsan ta a.

Kum hnih hnuah hmelmain an ram rawn do avangin putar pa thenawmte chu sipai a tang turin an ko vek a. Chu putar fapa chu a ke a bai avangin a zawm ve a ngai ta lova. Chu indona chu a rapthlak hle avangin a thenawmte chu an thi deuh vek hlawm a. Mahse a fapa chu kum hnih kaltaa sakawrin a lo hliam tak avangin a him phah thung.

Zakzum Hmeltha thuchah

Tuna I harsatna kha vanduaina nge vanneihna? I chunga thil thleng kha nakinah I la vanneih pui lovang tih a sawi theih loh.

Pian tirh ata mi fel leh hlawhtling ni ila vawiiniah hian he thu hi ka ziak lovang. Vanduaina anga kan hriatte hi thlir letin vanneihna an lo ni fo.

I thih hma chu hmalam hun hria an awm lo. Beidawng reng reng suh.