Social Media in Nun A Tihchhiat Dan

Facebook hma hringnun I la hre thei em?

Facebook hma khawvel kha chu dang tak a ni. Hmun hla taka chhungte nen phone-in kan inbia a, a hnuah email-in emaw thlalak te kan inthawn ve leh tawk thin a nia.

Tunah chuan a dan a dang ta. Hmun hla taka thiante pawh hi kan thenawm ang mai an ni.

Facebook hi Social Media an tih zinga lar ber pawl a ni a, Instagram, Snapchat, Twitter-te hi Social Media dang lar leh deuhte an ni.

Social media avang hian kan nitin nun a danglam phah tih chu nepte. Kan khawvel hriat dan leh inpawh dan, kan thluak thleng hian a thlak danglam vek thei.

Social media-in kan nun a tha lo zawnga a khawih danglam theih dan leh a bâwih kan nih theih hial dan ka tarlang ang.

Social media hian rilru leh nun a control thei tak tak. I pawisak loh chuan I chhiar chhunzawm a ngai tawh lo.

Social Media in nun a tihchhiat dan

1) A tak tak a ni lo.

Hmun nawm hmel tak takah nui sâng chungin nulate nen ka thlalak post chuai chuai ila lo hmu thei thenkhat min itsik tawk leh anmahni insitnana hmang tawk an lo awm ang.

Hringnunah buaina nei lo kan awm lo. Mahse a tha lai chiah ka post chuanin ka nun chu a tha bik veka lo ngai an awm dawn.

A nihna tak a ni lo. Chuvang chuanin mi thlalak nawm hmel tak  tak I hmuh kha a tak a ni vek lo, an nuna a tha lai emaw a that hmel lai chiah a ni.

2) Mahni inngaihnepna – Inferiority complex.

A hmasa a mi nen khian a inzawm. Mi nun tak tak ni lo nen I lo intehkhin khan I nun a nuam lo bikin I hria ang.

Mi chuan chumi khami an ti a, chutiang chu an nei bik tiin mahniah induhtawk lohna rilru a siam thin.

Chumi tak chu sumdawnna atan hmangin sumdawng hovin chumi khami ang chu I lei ve a ngai angah an ngaih tir ang che. Mi tih dan ang zela I tih loh chuan I thing bik angin I ngai ang. I rilru an control dan a ni.

3) A addict theih.

Zu ngawlveiin zu a in chak lutuka a khur ang hian a social media hi a addict theih.

Facebook-ah luh chhuah luh chhuah luh chhuah. Nilengin a tihtheih.

Lehkha zirlai leh thil dang pawimawh tih lai pawhin check chak tlatna a awm thin. Min 3 kalta khan check zo chauh mahla.

I rilru leh ngaihtuahna kha thil pawimawh atangin a pawtpeng nasa lutuk.

4) Hun chhiar sen loh I khawhral.

He khawvela I hun hi chin nei a ni.

Pawimawh miah si lovah chuan hun khawhralna tha lutuk a ni.

I hun khawhral zozai ai khan lehkhabu chhiar, exer lak, lehkha zir, thil thar (skill) zir la a let 100 in I hlawk zawk ang.

5) Titi leh Inrel.

A tawp tawpah chuan titi leh mi relah bawk a chhuak leh thin. Puitling tawh taka kan ngaih pawh hi tleirawl mi rel ching ang hian an khawsa leh thin.

Tihtur nei lo leh tum neilote tana hun khawhralna hmun a ni.

Social Media thah a hun em?

I tih tur pawimawh I thulh phah a, I thiltih pawimawh lai I kalsan fo a nih chuan Fb, ig, tih vel chu I thah a hun.

Heng kawng 2 hi ka hmang tawh:

1) I account deactivate rawh.

I in-control theih loh chuan deactivate vat rawh. Aw a harsa, hawn leh I chak ang. Mahse insum inzir rawh. I nu leh pa sawi thin angin nangma thatna tur vek a ni.

Kum 1-2 hnuah I rawn let leh pawhin engmah pawimawh I hmaih lo tih I hmuchhuak ang.

2) Awm rei suh.

Loh theih lova account I neih a ngai a nih chuan thil pawimawh atan chauh hmang rawh. Mi profile check kual tih vel leh miin enge an comment tih en a ngai lo.

Nikhatah min 20 emaw chauh hmang turin intiam rawh. Anih loh pawhin I tihtur I tih zawh vek hnuah chauh I hawng dawn nia.

---

Social media that lohna ka sawi teuh a, a thatna lai pawh a awm teuh.

1) Midang nena inpawhna leh thian siamna tha lutuk a ni.

2) Hman thiam chuan hriat zauna leh thil thar zirna tha tak a ni.

3) Sumdawnna – fakna leh intheh larna hmun tha em em a ni bawk.

Social Media hi kan khawvel thar a nih tawh avangin a that lohna hriat hi a PAWIMAWH lutuk. Anih loh chuan engmah hre lek lovin I nun a control ang.

Thupui tlangpui:

1) A tak tak a ni lo – miin midang hmuh tura an duh pholanna chauh a ni.

2) Mahni inngaihnepna a thlen – mi nuam chen lai thlalak I hmuh avangin I nun a nuam lo bikin a ngaih theih.

3) A addict theih – Check reng loh chuan â dawnin a inhriat theih.

4) Hun khawralna a ni – thil pawimawh atangin I ngaihsakna a la peng bawk.

5) Titi leh Inrel – tihtur hre lo ho mi relna leh sawichhiatna hmun a ni.

Inven dan:

1) That rawh – account deactivate vek rawh. Engmah pawimawh I hmaih lo.

2) Hun bi nei rawh – hnathawh zawhah chiah check rawh. Hun hmang rei suh.

Aw le, a thatna aiin a that lohna ka sawi tam zawk tih ka hria. He post hi a that lohna lak ata invenna tura ziah ka duh vang a ni.

A tawpah chuan social media hi khawvel tak a ni lo tih hria la, mi nunah leh khawvelah engpawh lo thleng se I nunah hmalam pan zel rawh.

 

Intawn leh hma zawng,

Zakzum Hmeltha