Mi pahnih an awm a,
Pakhat chuan thiam loh pakhatmah a nei ngai lo. A chhan chu chiang taka a thiam loh pawh a thiam loh a nih loh zia zanlai dar 12 thleng a hnial peih.
A pakhat zawk chu a khat tawkin tihsual nei thin mahse a tihsual avangin chhuanlam a siam ve ngai lo. Midang puh lovin amahin mawhphurhna a la thin.
Mi fel famkim kan awm lo. Mahse mi rinawm leh rintlak kan ni thei.
Chhuanlam siam hi naupan lai atanga kan zir tan a ni.
Nu leh pa, zirtirtu, aia upate hrem kan hlauh avangin chhuanlam kan siam thin. Heihi kan puitlin hnu thlengin kan pu chhunzawm ta thin a. Mi tamtak chuan an tar thihpui thak thin nia.
Vawiin I tlai chhan, exam I tih that loh chhan, Ka ti ang I tih I hlen loh chhan, eng dinhmun atan pawh chhuanlam a siam theih vek. He khawvela thil awlsam ber a ni.
Lehkhazir leh hnathawh hautak aiin a hnua chhuanlam siam a awlsam a, “Ka buai e mai. Ka hman ngang lo. Ka chau thei lutuk. A rem ngang lo a ni” tiin hun tamtak video game, movie, Facebook velah hun hmang lehlawi siin.
He khawvela a Ber ni thei te hi an themthiamna zinkawngah chhuanlam siama bansan thei vek an ni. Amaherawhchu bansan lova an beih chhunzawm avang chauhin vawiinaah kan hmelhriat.
I tih theih loh chhan chhuanlam chu bansan rawh.
Chhuanlamin I mizia a tarlang
A tihsual pawm mai lova engkim atana chhuanlam siamtu chu mi rintlak a ni lo. Thil pawimawh ti tura I rin a hlawhtlin loh chuan a thiam loh a nih loh chhan a hrilh leh tho ang che.
Chutiang ang mi chu thil pawimawh dang enkawl turin I ring ngam dawn em ni?
Mi hlawhtlingin chhuanlam an siam lo, mahni inzahin chhuanlam an siam lo, kum tin a at ngai ang chiaha mi a chuan eng dinhmun atan pawh chhuanlam siam tur a nei thung.
Chhuanlam tha leh tul a awm thei lo tihna a ni lo. Chhuanlam thate chu awm e – I chhungte hnai an thi, che thei lovin I damlo, I ke a bunga I kal thei lo, etc.
Mahse mi dawheh, mi rinawm lo mi chuan eng chhuanlam pawh hman a pawisa lo. Vawi tam dawta chhuanlam an sawi tawh avangin sual leh thil tha lo angah pawh an ngai tawh lo.
I thiam loh a nih chuan pawm mai rawh.
Chhuanlam siam lova mahni a mawhphurhna I lakin I puitlinna, I rinawmna I phochhuak. Mahni I inzah tih a lang.
I chhuanlamin a chelh bet che.
Duh leh chak nei ve si, mahse an duhin a tlansan zel mi chuan eng zawhna atan pawh chhuanlam a nei vek. Ka ngaihtuah thin a, he mi hian chhuanlam siam tawh lovin inenfiah se, a tlin lohna leh hma a sawn theihnate hi hmachhawn se mihring dang daihah a inthlak thei ang tiin. Mahse an thu a ni e.
Chhuanlam I siam ziah chuan hma I sawn thei dawn lo. Chhuanlam hote hi a aia lian zawkah a chang zel thin. A rei tial tial anga khuarkhurumah I pil thuk tial tial anga I chin dan thlak a har tawlh tawlh dawn.
I chin dan thlak hun tha ber chu nakin nilovin TUN, Tun hi a ni.
Leave a Reply