Tumahin An Pawisak Lo Che

Thinlung ngui leh chauva awmin.

I thinlung thuruk chu hriatpuitu nei lovin I nun khawhar takin I hmang a.

………………..

Khai le,

I taksa a khur. Mahni inringtawk lohnain I khat. I inhria. I rilruin a hria. I thinlung chhungin a hria.

Engmah I ni lo.

I laktlak loh.

Mahni pawh I inenkawl zo lo.

Midang hlau reng rengin I nung kumkhua dawn.

Saw nu I duh saw I hmu em? I ta tur a ni lo. I hmuh lai ngeiin midang a neihsan dawn che.

Midang chuan an duh an nei thei.

Duh leh chak nei ve tho mahla nang ve chu hei zawng chauh hi I ni.

I thinlung chhung a na.

Midang aia hniama inhriatna I nei a. I taksa chhung atangin ngaihtuahna tha lo a rawn chhuak thin.

I rilru a tawt a, I taksa chhunga mahni inrintawk lohna a kaitho thin.

Tumahin an pawisak lo che.

I rilru a insual buai mup mup kha an hriatpui lo che. I hlauhthawn avangin I khur tih an hre lo. Hlau chung chunga ti ve mai mai I ni tih an hre lo. Mal leh hrehawm ti taka mahni chauha awm I ni tih an hriatpui lo che.

Darthlalangah I enin enge I hmuh?
Chhuantur engmah I hmu lo.

Miin zah lo taka an cheibawl chein I thin a ur. Mahse tihngaihna I hre lo.

I thusawi ngaihsak pawh an awm lo.

I thusawi laiin miin an tawng chhilh zel che.

I hmeichhe duhin en pawh an en lo che.

Tumahin an pawisa lo. I feeling an pawisa lo.

Mi hmaah dinchhuah I hlau?

I zahzum vangin I duh I sawichhuak ngam lo?

I nunah tanpuitu I nei lo?

Tumahin an pawisa lo.

Hmeichhe hmaah I lai chhia? I be ngam lo?

I hmangaih nen a rem tawh lo?

Tumahin an pawisa lo.

Hmangaihna kawngah I tlachham?

Tumahin an pawisa lo.

Rethei, riltam, bangbo.

Tumahin an pawisa lo.

Dik takin darthlalangah inen rawh.

Tumahin an pawisa lova mahni inthlak duhna thinlung I neih loh chuan engdang mah a danglam dawn lo.

I khawvel thlak danglam turin I chhungrilah inthlak duhna thinlung I neih phawt a ngai.

Nangmah I ni. Midang I ni lo. Vawi khat chiah kan nung a, awmze nei lovin I khawhral lul lovang.

Duhsakna sang ber ka hlan a che.

I thian,

– Zakzum Hmeltha