Tun Aia Hun Tha A Awm Lo

Ka chau rih e mai.
Nakinah ka ti ang.
Tunah chuan tv ka en duh.
Ka hman rih lo.
Hemi zawhah.

Tunah ti rawh. Tun aia hun tha a awm lo.

I peih leh peih loh lam a ni lo. I duh tak tak a nih chuan TUNAH I ti ang. Tuna I duhthlan hi nakina I nun awmdan tur hril lawktu a ni.

Tunah video games, youtube, facebook I thlan zawk chuan nakinah a ngai tho I la ni dawn (mahse I tar sawt ang). Minute 10 lek hnathawh hnuah I hahchawl zel thei lo. Hahchawlh reng ngaiah I neih tawh avangin tlem hnathawh pawh I thiam tawh lo a ni e. Tlema a harsat deuh hlekin I thluakin a peih lo nghal zela I insiamthat loh chuan I hmalam hun chu inchhirna in a la khat ang. Nilenga I thawh hnuah chiah zanah I hahchawl dawn nia. Hlawhtlin I duh chuan hahchawlh hun neih loh chang pawh pawi I ti lovang. Tuna hun tha I neih lai hi hmang tangkai rawh. TUN bak hi hun I nei lo. Nakin a awm lo. Tun chiah a awm.

Lawmman dawng turin thawhrim I mamawh.

Thil tha leh hlu thawk hah hmasa lovin I nei thei ngawt lo. Chaw ei thata workout ngat ngat phawt lovin I taksa a lian ngawt dawn lo. Tunah lawmman I duh nghal a nih chuan bansan mai rawh. I buh chi tuh enkawl hmasa phawt lovin tunah ENGMAH I phu lo. Tuna rohlu duh nghal hote chu nawmsipna um mite, kawng harsa apiang pumpelh dan zawng mite hi an ni. An nun en la, an hun hman dan atangin eng ang miah nge an chhuah dawn? Engah mah an chhuak ngai lo. Mi hlim lo, tum nei lo, nun kawrawng leh khawvela beidawngah an chhuak thin. Anmahni anga I chhuah ve duh chuan an hun khawhral dan entawn rawh. Anih loh chuan an tihdan letling zawng chiahin I hun hmang rawh.

I rilru kuai pengtu hahchawlh hun atan khek rawh.

Minute 10 lek Facebook I luh khan I rilru hmun dangah a la peng vek tawh. I tumruhna rilru kha a dul zo. Minute 10 chu rang takin a rawn zo a, I rilruah hnathawh a awm tawh lo. Facebook atangin hun khawhralna nuihzathlak video lamah I pakai leha darkar tam tak I hman phah ta zek a. Tichuan zan mut a lo hun leh tawh. Ni khat I hmang ral der.

Hunin tumah min pawisa lo

Tunah peih lo mah la minute 5 lek hnathawh luih zir rawh. I tihluih zel chuan a aia reiin I chhunzawm zel mai ang. Tunah I duh loh leh peih loh I tihluih loh chuanin nakinah I thatchhiat rah I la seng dawn. Inchhirin awmzia a neih tawh loh hunah, “Lo bei lui hram hram ila” I la ti ang. I tihluih hram hram loh vanga I hun khawhral zozai kha ui em emin I kokir leh thei tawh si lo. Tu dang mah mawh a ni lo.

Hun a liamin I upa telh telh a, thil thar I thiam har telh telh bawk. Kum upat lutuk luat vanga thiam theih loh awm lo mahse tuna I la naupan zawk laia tih chu mi rilru nei chuan a thlang zawk ngei ang. I tih dawn tho tho chuan I thiam theih lai, tuna tih chu awmzia a awm zawk lawm ni?

Tunah ti la. Nitinin chhunzawm rawh. Midangin hun khawhral mahse lungngai suh. Nakinah an hun khawhral man an seng laiin mi dawhthei leh taima ten nuam an chen ve thung ang.

Mahse nakinah nuam chen turin Tunah I thawh a ngai. I duh tak tak chuan thih hial pawh huamin I bei ang. Thih I huam em?

Tun aia hun tha a awm lo.

Tun hi I hun a ni e.