I thutiam hlen rawh. I sawi tum chiah sawi la, I thusawiah ding nghet rawh.
Mi hnenah “Zing dar 6-ah ka rawn lam ang che” I tih tawh chuan dar 6-ah I thleng tawh tur a ni.
Nizan I muhil theilo? I peih lo? I chau lutuk? I thusawi chu hlen rawh. Natna hrehawmin a tlakbuak che a nih loh pawhin harsatna pawimawh deuh a thleng thut a nih loh chuan I tiam hunah chat I thleng tur a ni. I theihloh chhan chhuanlam siam tur a ni lo.
Thutiam sut leh turin thu I tiam lawk thin em? A thusawi hlen lo mi chu a ka atanga chhuak a rintlak loh. Thusawi aiin thiltihin thu a sawi ring zawk.
I thutiam I hlen dawn lo a nih chuan thu tiam suh. I thil tih tum midang hrilh a, insawitheihnana hman hnua I tihhlawhtlin leh si loh chuan I mualpho mai mai.
Thuchah: I hlim laiin thu tiam suh.
Tu hnenah pawh ka hlen ang I tih chu I hlen ngei tur a ni. I tih chak em em I tih hman loh phah pawh a ni thei, a dawnah I peih leh lo, I phur leh lo thut a nih pawhin I hlen tho ang. I thutiam chu rangkachak angin hlut rawh.
Chumi niah ka tifel ang I tih chuan I tifel. Chumi darkarah ka rawn thleng ang I tih chuan I thleng chat. Mi sawmna che ka rawn kal ang I tih chuan I hlawhtlin ngei. Ka pe ang che I tih chuan I pe. Ka lo siamthat sak ang che I tih chuan I siamthat sak. Hrethiams?
Mahni thusawi hlut hi mahni inzahna a ni. Mahni inzah lote chuan thu an chhakchhuak teuh a, hlen leh si lovin nuihzatbur an ni.
Miin a thusawi leh thutiam hlen thin mi a an hriat che chuan an zah sawt ang che. Mi rintlakah an ngai che anga, hmeichhiain an duh a, nangmah pawh I inringtawk sawt bawk ang.
A thutiam hlen thin mi chu thlawp lo mahla an zah loh theih loh. He mi chu a thusawi hi ka tawmpui lo, mahse a thutiam a hlen zela mi rintlak tak chu a ni ve ngei mai.
Thu Hlen A Awl Lo
Thu hlen hi a awl hauh lo. Ka tlakchham deuh thin a ni nghe nghe. Midang tihlawm tum avanga thu lo tiam mai hi a awl thin hle. Amaherawhchu mahni insiamthat duhna thinlung atanga rawn cho chhuakin ka thutiam chu ka hlen ngei ngei ang tiin thu ka intiam ve thung.
Midang hnena thutiam hlen aia harsa lehzual chu mahni hnena thutiam hlen. Chumi chu ka hlawhtlin ngei ngei ang tia mahni intiam hnuah I bansan leh mai thin em? I mal hauh lo. Mi tamtak tih dan a ni. I awm dan thlak I duh chuan I rilru ngaihtuah dan thlak la, mahni inzahna thar nen I thutiam hlawhtlin hma chu bansan suh.
Kharna
I thu kha rangkachak angin hlut rawh.
Thu hlen hi mahni insiamthatna kawng tha tak mai a ni. Mahni inzah mi chuan a thutiam a hlen thin.
Amaherawhchu mihring kan ni a kan famkim lo. Engkim kan thunun thei lova harsatna a lo thlen avanga kan hlen theih loh chang pawh a awm thin. I thusawi I hlen thelh a nih pawhin a pawilo tiin theihnghilh mai lo la, a dawt lehah chuan hlen tawh ngei ang che.
Nangmaha thu I intiam pawh nangmah chiah hretu I nih avangin a pawimawh lo bik lo, hlen loh a awl em avangin a pawimawh zawk. Mahni chunga mi rintlak I nih chuan midang chungah pawh mi rintlak I ni ang.
I thian,
Zakzum Hmeltha
Leave a Reply