Hmeichhiain Hmel An Pawisak Em?

A hmasain hmeichhia I nih chuan ngaihtuah buai ngai lovin mipain hmeichhe hmelhmang an en hmasa ber thin tih chiang fakauin ka hrilh a che. I duh emaw duh lo emaw mipa nihphung ve reng a ni.

Mipa nih erawh chuan tlemin a khirhkhan deuh.

I hre ve tawh thin ang, hmeichhe thenkhatin “Hmel a pawimawh lo” an ti chiam a, mipa thenkhat titawk an awm bawk.

A dik em? Hmeichhiain hmel an pawisak em? Hmel nge pawimawh mizia?

Khai Khai Khai, lo ngaithla rawh u, Zakzum Hmeltha zawhna an zawt dawn e.

Zawhna: Pu Zakzum Hmeltha, hmeichhe thenkhatin hmel a pawimawh lo an tia, hmeichhiain hmelhmang an dah pawimawh lo tak tak em ni?

Zakzum Hmeltha: Hmeichhiain hmelhmang an dah pawimawh. A taka an sawi chhuah loh pawhin mipa hmelhmang – hmel, incheidan, taksa pianphung chu an dah pawimawh reng a ni.

Zawhna: A nih chuan dawt an sawi tihna em ni? A thenkhat phei chu an dinhmunah an tang nghet em em mai bawk si a.

Zakzum Hmeltha: Dawt an sawi aimahin a nih dan tak an sawi kim lo, an sawi fiah lo a ni zawk awm e. Hmeichhiain an duh an hre lo fo thin. Hmeichhe duhzawng chu anmahni aiin hmeichhe lama zei tak mipain an hrechiang zawk. Sangha man dan chu sangha ni lovin sangha mantu zawt rawh an tih kha.

Mipa hmeltha, film star leh milar hmeltha te an atchilh thin atangin hmel an pawisak tih tih a lang. Amaherawhchu miin an zawhin “Hmelhmang a pawimawh” tih chuan mi ril tak anga lan a theih loh.

Zawhna: Hmeichhiain mizia a pawimawh zawk an tih hi enge ni ta ang?

Zakzum Hmeltha: Aw, hmel a pawimawh lo an mizia a pawimawh zawk tia chhal tawk an awm a. Heihi hriat tur, hmeichhiain an mizia a pawimawh an tih chuan ngaihzawng tak tak atan an mizia a pawimawh an tihna a ni.

Ngaihzawng atan enge pawimawh tih zawt lo mahla an chhana che kha ngaihzawng atana chhana a ni.

Hmeichhia ka vawi khat hmuhna a ni a, ka chinchang engmah a hre lo, tunge ka nih a enge ka mizia pawh a hre lo. Ka hmelhmang atang BAK lo chuan min thlithlai thei lo. Ka mizia a hriat hma hauhin kan inkarah boruak a awm nghal fo thin.

Zawhna: Eng vangin nge mizia hi inngaihzawnna atan a pawimawh?

Zakzum Hmeltha: Tumahin an hriatchian mang loh ralkhata an hmuh nen an inngaizawng nghal ngawt dawn lo. Titak deuha inkawp tur chuan hmel chauh ni lovin an mizia leh engang mi nge an nih hriat a ngai. Hmel chauh lo thil dang pawh a pawimawh tel tawh. Pawimawh ve ve tho mahse hmel aiin mizia an sawi mai zawk a ni.

Zawhna: Hmel hi engang chiahin nge a pawimawh?

Zakzum Hmeltha: Ka lo tawn tawhah chuan hmel chu a pawimawh chiang. Ka sawi tawh angin ka hmel, incheina, taksa ka enkawl thata ka inthlak hnuah hmeichhe min en dan a danglam vek. Mi thusawi atangin leh an mitmeng atangin ka hria. Tawngkam sang tam aiin mit mengin thu a sawi ring zawk.

Zawhna: I hmelthat loh chuan I vanduai kumkhua dawn tihna em ni?

Zakzum Hmeltha: Ni lo ve. Kan hmel awm dan tam tak hi chu Pathian min siam dan nih mahse I vanduai kumkhua dawn a ni ngawt lo. Eng emaw chen chu kan insiamtha thei vek. I hmel I enkawl tha thei, I hairstyle inhmeh tur I pu thei, I thawmhnaw inhmeh tur I thlang thei, I hmaia thau chuang awm lo turin I cher thei a, I taksa sek leh mawi turin I workout thei. A tam mai.

I hmelchhiat viau chuan pawisa siam teuhin mi hausa tak ni la I tan a awlsam sawt ang. Mi lar leh dinhmun sang chelh I nih phei chuan a awlsam lehzual ang. Mahse khalam chu vawiin titi piah lam a ni.

Hmeichhiain sawi lo mahse hmelhmang an pawisak.

I mizia a hriat hma hauha hmeichhia nen in inkara induhna a awm nghal thei hi I hmelhmang vang a ni. Mipain hmeichhia chu an hmelah kan en tih kan hre vek. Hmeichhia pawhin an en ve tho.

Chumi chu hre rengin I nu leh I pa chi tha ber dawng lo mahla I hmelthat theih tur ang berin insiam
tha rawh. A nih loh chuan hmeichhiain an duhzawng anga an sawi, ni si lo ang nih tumin I hun leh ni I hmang ral ang.