He thuziak hi mipa thil tawn leh experience a ni.
Virgin I la nih avanga zahna leh inthlahrunna I neih chuan he thuziak hi I tan a ni e.
“Virgin I la ni em?” tih zawhna I hmachhawnin engtin nge I awm…..Zahnain ka khat thin.
I rualpuite zingah virgin I la nih bik chuan mahni indemin insawisa suh.
Virgin nih avanga mahni inrinhlehna
Heihi hrethiam la, virgin nihna hloh hi intihsiakna a ni lo. Thenkhatin an hloh hma a, thenkhatin an hloh har deuh a, thenkhat hloh miah lova boral pawh an awm. A tawpah chuan kan chan tur chu a inang vek.
Mipat hmeichhiatna hrethiam rual nih tawh chuan hriat chakna leh tem chakna a awm a, kan thiltih chhan tam tak hi hmeichhe ke inkara kan luh theih nan a ni. Hmeichhe lama zei lo leh inringtawk lo mi chuan a virgin nihna a hloh ngawt dawn lo. Hei hian kawng tam takah a tibahlah thei.
Thenrualte zingah virgin la nih bik avanga zahna a awm thei tih ka hria. Miin “Virgin I la ni em?” tih zawhna an zawt ang che tih I hlau ngawih ngawih tih ka hria. Nula an mutpui tawh chungchang an titi sup sup laia a sira lo inthlahrun ruk a awm thei tih ka hria. Virgin la nih avanga hmeichhe lama hmalak hlauhna a awm thei tih ka hria. Kum a lo reiin rilru a luahkhat deuh deuh thin tih ka hria. Midang aia inngaih nepna leh hlu lo bika inngaihna pawh a thlen thin tih ka hria. Nuna beidawnna thlengin a thlen thei tih ka hria.
Ka thian I dinhmunah ka lo awm tawh thin.
Zakzum Hmeltha’n a chanchin a sawi
Ka naupan laiin inneih hma chu mitinin mipat hmeichhiatna an hmang lo turah ka ngai ve tawp. Sex chungchang min hmelhriattirtu an awm lo. Thiante nen hmeichhe hmeltha kan tih deuh leh kan duhzawngte chu sawi ve thin mah ila chu aia thui kan sawi ngai lo. Ka tleirawl chhohvin kan insawn kual vel nen thian kawmte lo dangin titi pawh a lo danglam chho tan a. Mipa tleirawl rual an riah khawmin hmeichhe hmeltha leh hmelchhia chungchang, sex chungchang a tlaivar pui thak theih. Chutah internet lamah blue film (porn) hmuh tur a lo thahnem chho bawk nen.
Ka sakhuana leh zirtirnain nupui neih hma chu virgin nih tur ti mahse ka thian kawmte’n zalen taka an hman avangin virgin ka nihna ka ngaimawh tan. Mi tam tak innei kher lo pawhin zalen takin sex an hmang tih ka hmuchhuak ve zel bawk a.
Ka thian kawmte sakhaw ruhkawl fate ni vek se chu a danglam ka ring. Kan bula mite awm dan zir ve zel hi kan mihring mizia a ni. Tleirawl chhoh lai phei chuan rual awh a na lehzual.
Thiante’n nula leh sex chanchin an sawi laiin kei erawh chu a sirah lo nuih pui bak thawh tur ka nei lo.
Ka chungchang thui lutuka ka sawi loh nan kaitawi ila. Mahni insiamthatna kalkawng ka zawh tan a, ka virginity ka hloh nghal….han ti dawn ila a ni hauh lo. Kum engemaw zat chu hmeichhia hlir ngaihtuah chungin ka hmel, taksa leh nun dan lo danglam mahsela ka la hloh chuang lo. Ka sakhaw rinna avangin inthiamlohna ka nei deuh nge ni ka dawihzep zahzelah ka hmang zawk pawh ka chiang lo.
Chhungrilah ka thinlung a dam hleithei lo. Virgin ka la nih avangin mi min ngaihdan ka ngaimawh hle a. “I la virgin em?” tia min zawh ka hlau ru thin. “Aw” ka tih chuan miin mak an ti thung. Nang chu ni ila…tiin min dem lek lek lo chauh.
Ka tleirawl chhoh laiin mahni inhuatna thinglung ka nei a. Hmeichhe hmelthain min duha ka rin loh thin laite, virgin ka nihna ka hloh theiha ka rin lohnate leh ka inngaihnepna rilru kha ka lo la bansan lo.
Ka zahna leh mahni inrintawk lohna zawng zawng kha ka hloh veleh bo turah ka ngai a. Ka hmel leh ka inkengkawh dan atangin mi confi tak angin lang mah ila chhunglamah he thil avang hian ka thlaphang fo thin.
Virginity Ka Hloh
Ka thaw huai mai. Ka virginity ka hloh chu ka nun a danglam vek. Mi thar ka ni. Han ti vel ila…..a ni hauh lo.
A tuk zing ka tho chu keimah tho ka la ni. Nidang ang bawkin ni a rawn chhuak a, virgin ka nih tawh loh avangin ka danglam phah lo. Thil thar ka hriat phah thung, chu thil thar chu….
Kum hei leh chen ka vei hnuah khami zawng kha maw lo ni a? Lo huaisen ilang chuan ka hlohna a rei tawh ang. Ka hmelma lian ber chu keimah a lo ni reng mai.
Tunah chuan “Virgin I la ni em?” tiin min zawt mahse “Aw” pawh ti ila ka pawisak tawh lo. Mak tiin min nuih ru pawh nise ka pawisak awzawng lo. Leihlawn lehlam panga I awm hnu chuan I ngaihtuahna leh buaina lo hoh zia I hrechhuak ang.
Virgin I la nih avangin I hlutna I hmu hniam tur a ni lo. I inhmuh hniam tlat chuan I ngaihtuahna kha a takah a rawn chang ang.
A hunah a lo thleng ve mai ang
Engtikah mah I hloh theih I ring lo hial maithei. Hun a liamin a har telh telhin I hre lehnghal.
Kum tin engtikah nge ni ang tiin vawi tam ka lo dawn tawh thin. Mahni inenkawl tha la, invawng tha la, hmasawn zel rawh. Lungngai suh a la thleng ve mai ang.
I nupui neih thleng I nghak duh a nih chuan I duhthlannaah ding nghet rawh.
Midangin an hloh tawh avangin I nep bik lo.
Mi Thiltih Avangin Intilungngai Suh
Zawhna: Virginity I hloh avangin pangang atangin phengphehlepah I chang dawn em? I nun zawng zawng a danglam phah vek dawn em?
Chiang fakauin ka hrilh ang che – AIH.
Phengphehlepa chan chu kawng awl a ni lo, sex hman chu a harsa lo thung. Sex chu mi naran, tum nei lo leh mi thatchhiate pawhin an hmang teuh alawm. Anmahni a thlak danglam chuang lo. Mi tlaktlai lo chu sex hnuah mi tlaktlai lo a la ni tho.
Virgin nih hi I rin aiin a thupui lo ang (ka awih lo thin). I vei leh I lak thutak ang ziazang a lo ni hauh lo tih I la hria ang.
A tawpa ka thuchah duh che chu virgin I la nih avangin hrehawm ti suh. Mi ngaihdan che avangin inhmuh hniam phah suh. Ka tlin lohnate avangin hmeichhe duhzawng mipaah ka inthlak a, a hloh hmasate ai daihin ka chan a tha zawk. Ngaihzawng zawnga an buai laiin ka duh ber ka thlang thei.
Virgin I la nih avanga I thinrimnate, I hlauhthawnnate, midang I tluk lova I hriatnate hi mahni insiamthatnan hmang hlauh rawh. Meituah tha tak a ni.
Duhsakna sang tak nen,
Zakzum Hmeltha
Leave a Reply