Pastor tha chuan minute 20 chhungin sermon a sawi zo thin a. Mi rilru tina miah lova na taka sual dem dan a thiam a. Nitin zing dar 8 atanga zan dar 10 thleng hna chi hrang hrang a thawk a, thuhril leh kohhran member tlawh pawh a thulh ngai hek lo. Thla khata Rs.10,000/- hlawhin thawmhnaw mawihnai tak tak leh suit thar te a ha thin a, lehkhabu tha a lei deuh reng thei bawk. Chhungkaw khawsak dan pawh mawihnai tawk, mikhual dawl zo zanin a enkawl a, lirthei eng emaw tal a nei a; thla tin thawhlawm ipah Rs.2,000/- vel a thun ziah thin a ni.
Heng bakah hian vantlang tana thawhlawm leh thil khawnah a pawk pawl a ni ngei ngei bawk thin. Pastor duhthusam chu kum 30 vela upa, thuhril leh rawngbawlna kawng danga kum 30 tal inhmang tawhte hi an ni. Tumkhatah a sangin a tawi mawi tawk thei a, sa pan mawi tawk rit nelh nawlh, hmeltha tak a ni tur a ni. A mitmeng chu a pakhat tal buang theng thawng ni se, a pakhat zawk erawh chu a dumpawl fim raih ni thei se a tha. A sam chu a lai takah ngil takin bari a then a; a leh lam chu sam dum ngil seng sawng mam taka khuih a nih laiin a leh lam erawh chu buang leh kir mawi tawk a ni a.
Tleirawlte nena rawngbawlho a chak ngawih ngawih laiin a hun tam ber chu tarte kawm hlimna hun atan a hmang thin a. Mi nelawm leh fiamthu duh a nih lantir tura a nuih deuh reng avangin rawngbawlna a lak thutak zia a bo chuang lova. Ni tin kohhran mi chhungkaw 15 tal a tlawh ziah thin a, a hun tam ber chu kohhran ngaihsak lote hnuk hnai turin an zingah a hmang a; nimahsela amah mamawhtute’n an pan hun apianga lo kawm turin a quarters-ah a awm deuh reng thin a ni. (471)
A naupan viau chuan experience a la nei tlem lutuk a, a sam a tuak tawh chuan thalaite zinga rawngbawl turin a tar lutuk tawh bawk si. Fa panga paruk lai a neih chuan duh aiin a nei tam a, a neih loh erawh chuan entawn tlaka ni bawk si lo.
Sermon ziaksa en chunga thusawi thin a nih chuan a ro lutuk tih lantirtu a ni a, ziak en lova a sawi chuan thlarau pawl mi anga lan a tum tihna a ni.
Pathian Thu chhiar leh inbuatsaihna atana hun a hman tam lutuk chuan kohhran member-te a ngaihsak tawk lo tihna a ni a. In danga a len chhuah deuh reng erawh chuan Pastor len cheh, a rawngbawlna atana inbuatsaihna hun nei tha lo tak a ni ang.
Kohhran member rethei zawkte a ngaihven viau chuan an ngaihsan hlawh tum mi a ni tih a lantir a ni mai a, mi tha leh hausa ho zinga a tlaktlum viau chuan mi rethei ngainep mi a ni tihna a ni.
Kohhran hmasawnna tura rawtna a ngah viau chuan hlau rawh u, dictator a la ni mai ang; rawtna nei ngai miah lo a nih erawh chuan in kohhran kha a vei thlawt lo tihna a ni.
Sual haw mi a nih chuan mi khirh tak a nihzia sawi hran a ngai kher lova, sual ngaizam thei mi a nih hlauh erawh chuan a thil tawn ang zela insiamrem mai mai thin a nihzia a lantir a ni.
A thusawi tifiah tura entirna pek a uar viau chuan Bible a ngaihthah tihna a ni a, entirna pek tur a hriat loh erawh chuan a sawi turah amah pawh a fiah tawk lo tawp a ni ang.
Thudik pehhel lova sawi thin a nih chuan mi pawisawi hreh miah lo a ni ang a, thudik tak pawh a sawi chhuah ngam loh chuan a dera tha ve mai mai a nihzia a lantir a ni.
Darkar khat dawn dawn thu a sawi chuan hun ren nachang hre lo a ni a, tawite chauh a sawi thin chuan a thatchhe hle tihna a ni.
Sawma pakhat leh thilpek lam a sawi uar viau chuan a hamthatna tur a ngaihtuah tihna a ni a, a sawi ngai lo a nih ngat chuan kohhran hmasawnna tur a vei miah lo tihna a ni mai.
Amah ringawtin thu a sawi fo chuan kohhran hovin an ning mai thin a, thuhril tura midang a sawm fo chuan a mawhphurhna pumpelh a tum vang mai mai a ni.
A hlawh tam viau chuan hlawh duh vanga thawk a nihzia a chiang mai a, a hlawh tlem viau erawh chuan a phu tawk chauh a hlawh tihna a ni. (472)
-Richard De Haan
He thuziak ka rawn lakna hi Hringnun Dictionary atang a ni.
—————————
A thuziak atang hian a chiang hle mai: Mi zawng zawng I tihlim thei lo.
He thuchah hi Pastor tan chiah a ni lo. Nangma tan pawh a ni.
Mihring mizia chu phun a ni. Mipuiin pastor famkim pawh lo nei tehreng teh se, amah itsika sawiseltu an awm leh tho dawn.
Chuvang chuan midang tihhlim leh tihlawm tum lovin, nangmahin thatna leh felna kawng chu zawh rawh.
I kalkawng zawh laia kawngsir atanga lo ankhumtute lakah I beng tiphui tlat rawh.
Tawp lova kalkawng zawhte chuan an tum ram an la thleng dawn si a.
Mi lunglengte thian,
Zakzum Hmeltha
Leave a Reply