Note: A hmasain email min thawnin In hming tak hman a ngai miah lo. Amaherawhchu ka chhan let in duh chuan in email tak in dah a ngai thung.
Email a zawhna apiang post-ah ka chhang dawn lo.
In email leh in hming hi phochhuah a ni ngai lovang.
Tihian email ka dawng a:
A hming in naupangte chung in ktp ah group hruaitu ah te min dah ve mah se ka dawi zep vang leh tawng kam kam ka thiam loh em a vang in ,ka ngaih dan te pawh hi ka sawi ngam lo thin a , hruai tu mawl min tih phah fo na ve thei det ka thil hriat ang te ka sawi chhuah dawn te hian ka dang hi awk tlat zel
thei tawp chuan tawng kam thiam leh mi biang biak te hi phak angtawk in kan zir ve thin a tlem chuan hma ka sawn ve chuan ka in hria
twng kam thiam lo zak zum vang hian mol tih hi k hlawh ve fo
KA ZAWH NA HI MIN CHHANG THEI CHUAN KA LAWM NGAWT ANG
Ka tleirawl chhoh lai khan thian inkawm leh midang nena inbiak hian ka duh sawi chhuah ka tum apiangin thil pakhat a thleng ziah mai a.
Ka ka atangin aw ri chhuak tur a awm thei meuh lo.
Rilruah ka sawi duh chu chiang takin hre mah ila ka dang a awk tlat zel a, a tihngaihna lah ka hre bawk si lo.
Tawngkam Thiam Dan
Keipawh thiam vang ni lovin, thiam loh vang zawkin mahni inzirnan tiin naupang hruaituah ka lo tang ve tawh a.
Ka thiam lova a tirah phei chuan ban nghal mai ka duh hial a ni.
Thil pakhat chu atu amah hi hruai turin an tling lawk hauh lova an thiam lawk hek lo.
Inzir chawpa thiam ve mai an ni.
He thuziahah hian mi biangbiak dan ka sawi dawn lova, tawngkam thiam dan ka rawn tarlang ang:
1) Mahni inbiain inkawm fo rawh.
Mi awm lohna hmunah leh fianrialah, tumah hriat lohna hmunah te inbiain inkawm fo rawh.
Lemchan thiam (actor) angin inngai la mi bula I awm huna I thusawi tur te lo zirlawkin lo ngaihtuah lawk rawh.
A ri ngeiin sawi chhuah zir rawh.
I zir tam poh leh I thiam a ni mai.
Mi tawng tam te hi mi tawngkam thiam chu an ni duh.
2) I tawng leh I thusawi record rawh.
I tawng lai te, I lehkhabu chhiar rik te, mi nena I inbiak lai te audio record rawh.
Nakinah play let leh la – ngun takin ngaithla la, zir chiang la, I hmasawn theihna tur zawng rawh.
3) Lehkhabu chhiar tam rawh.
Lehkhabu chhiar hi finna ka tih tawh kha.
Chu chauh chu a ni lo, thumal I zir belh anga tawng dan tluangtlam I zir phah bawk ang.
I lehkhabu chhiar kha a riin chhiar chhuak rawh.
4) A chunga ka sawi te hi bansan lovin tinawn tluk tluk rawh.
Eng vangin nge miin hma an sawn theih loh?
An peih tawh loh avangin reilote hnuah an bansan leh thin vang a ni.
Nangpawh hi I bansan dawn lo ka ti lo thei lo. Kawng awlsam kan duh vek a, mahse I hriat tura chu kawng awlsam hmangin I harsatna I hneh thei lovang.
A chunga ka thusawi hi I tihnawn I tihnawn chuanin hmasawnna I hmuh nghal loh pawhin lungngai suh, HUN a lo liamin hma I sawn em em dawn.
Bonus) Mi tawngkam thiamte ngun takin thlir rawh
Inzir mi kan ni a, tawngkam thiamte chu tute nge? Engtin nge an tawng a, engtin nge an tih bik?
Ngun takin zir chiang la, an thusawi en liam mai lovin zir theih I nei em tiin lo enthla rawh.
A tawpna atan,
I chhungah mahni insiamthat I duh tih a lang a, miin mi mawl tia an koh che pawhin ENGATAN mah ngai suh.
Rinna nei tlat rawh.
Leave a Reply