Thihna Hlauh Tur A Ni Lo

Thihna hi a hlauhawm tih engtin nge an hriat? Thihna hi he khawvel atanga hahchawlhna a ni lo tih engtin nge an hriat? Mi thenkhatin mitthi tawh phawt chu he khawvela hlawhchhamah an ngai a, a fel lo a ni ngei ang, a chan tawk, a hlawhtling ta lo, tiin an chhuahchhal.

He khawvela nun awmze nei lo taka hmang, damchhunga engmah hlawhtlin nei lo, midang tana tangkai lo, mi hnawksak, nitin khawhral mai mai te tan chuan nun leh thihnain danglamna a nei lo. An taksa nung reng mahse mitthi ang tluk an ni.

Thihna hlauh tur a ni lo.

Kan la thi vek dawn.

Thih I hlauh avangin engmah umzui ngam lovin, inchhungah tawmbo reng pawh ni la I la thi dawn. Thih hmabak vek kan ni. Nang, kei, I hmangaihte, nangmah hawtute, vawiina I hmuh I hmelhriat lohte pawh kha. Kan hun a lo thlen meuh chuan engmahin min chhanchhuak thei dawn lo.

He thudik hi zahzumna’n leh tlanchhiatna’n hmang lo la, he khawvela I hun neih chhun awmze nei tak leh huaisen taka hmang zawk turin nangmah phalna inpe rawh.

Nunna pakhat chiah I nei, he khawvela I hunin chin tawk a nei. I hun a ral hmain I theihtawpin nung la, huaisen takin, I thinlung duhtak chu thupha chawi lovin umzui rawh. Eng kawng pawh zawh la I tha zawng zawng, I thiamna zawng zawngin hmachhawn rawh.

Phalna dil suh

He khawvela I duh tak umzui turin tuma phalna I mamawh lo.

Chumi chu ka tithei angem? Ka thinlunga vei em em mai ka nei a, ka tihtheih I ring em?

Tu phalna mah dil suh. Midang phalna I mamawh lo.

Mi tamtakin I tumnate an thlawp lovanga an tawmpui dawn lo. I theihtawp I chhuah anga I duh chu I umzui ang. Midangin I tana an duhsak che ni lovin nangma duh ngei I umzui ang. I hlawhchham ta anih pawhin inzirna tha em em mai a ni. Bei hmasa lovin engmah a inzir theih loh. I damchhungin hlawhchham hlauva I awm chuan engmah I puitlin dawn lo. I damchhunga nun awmze nei lova nun chu thih aiin hlau zawk rawh.

Thihna pumpelh tur kan awm lo

Thihnain I nun kawngkhar a rawn kik hunah I nun I thlir let anga mi sawichhiat I hlauh avanga I duhzawng I umzui ngam lohte, hlawhchham I hlauh avanga I duh I um ngam lohte I hrechhuak ang.

Chutih hunah chuan I inchhir I ring lo em ni?

Thi tur tho tho te chu engatinge KEIMA duhzawng ka lo umzui loh tiin I inzawt ngei ang. I thih dawna hun I neih tawh loh nghak kher lovin tun atangin I rilru insiam thar rawh.

I thinlung kohna che ngaithla rawh

Midang ngaihdan ni lovin, midangin ti tura an beisei che ni lovin nangma duh anga I nun ngam a pawimawh.

I thinlung duhzawng chu ngaihthla la, I nunna inhuam khawpin umzui rawh.

I thinlung duhna midang nen a inang kher lo thei, tuna I duh chu nakinah a lo dang leh daih thei. A pawi miah lo. Tuna I thinlung duhna chu Sipai officer nih pawh a ni thei, infiam mi professional athlete nih pawh a ni thei, thusawi thiam khawvel fang kual nih pawh a ni thei. Tuna I thinlung kohna chu chhang phawt rawh.

I duhzawng chu engtin nge I umzui ang? I kalkawng thlana hmasawn turin NITIN hma la rawh. I thinlunga I hlauh mahse I hmasawnna tur ni si chu I hmachhawn a ngai. Hlau em em chungin, I thaw thei dawn lova I hriat pawhin tilui rawh. I inchhir lovang, I tum avangin I inchhir dawn lo, I hlauhna I hmachhawn ngam loh avangin I inchhir zawk ang.

A tawpah…

Kan la thih vek dawn avangin thihna hi zalenna petu ah che ngai rawh. A tawpa kan chan tur a inan vek avangin I neih zawng zawng hloh huamin I thinlung chhunga I vei em em chu tihhlawhtlin tumin sual rawh.

I umzuina kawngah I thi ta a nih pawhin I nun chu nun hlu leh zahawm tak a ni.

He khawvela thil hlauhthawnawm ber chu engkim I neih chan ngam loh hi a ni. Engkim nei turin engkim hloh huam a tul.

Mahse, I hringnun hman dan chu I thu a ni e.