Thumal Sawi Har Ber

Thumal pakhat sawi har em em mai a awm a. He thumal hi sawi a har em em chhan chu mi kan tilungni lo ang tih kan hlauh vang a ni. Mahse he thumal hi tim lova I sawi theih chinah chuan I nun a thlak danglam ang.

Chutiang khawpa tawngkam khat thiltithei a awm I ring lo maithei. A awm.

Chu thumal chu ka hrilh hma chein enge nia I rin, han inngaihtuah teh…

……

……

……

Zakzum Hmeltha thumal sawi har ber chu min rawn email thei em?

Aih.

Zahmawh rawngkai a ni em?

Aih.

A nih leh zawhna dang daih – tunge I nih a I hmel I tilang thei em?

Aih.

Ka bialnu hi he khawvela ka damchhan a ni em?

Aih.

Miin party-ah min sawm a, ka kal chak miah lo, mahse aih tih chu a mawi chiah bawk si lo. I rawn kal dawn em an tih chuan engtin nge ka chhan ang?

Aih I ti ang.

A chhan leh vang sawi kual duah lovin Aih tih zir rawh.

Aih Tih Hun

Mi thenkhat inthlahrung leh lutuk hi an awm thin a – Thiltih tur pawimawh an neih laia miin pawimawh lova an sawm pawhin Aih tih an hreh avangin nuam ti lo takin an kal hram hram thin. Hei hi mahni inzahlohna leh mahni inhremna a ni.

Thil pawimawh tih tur I neih chuan a aia pawimawh lova chu I hnar ngam a ngai. I hnar ngam loh pawhin tun atangin I inzir a ngai. I hun a ni a, hlut rawh. Midang thuneihna pe suh.

Mi dilna leh ngenna I hnar ngam loh chuanin an hre thuai ang a, zah lek lo chein engpawh dil an hreh lovang che. Thilphal leh fel chu a tha, amaherawhchu a lutuk nih chu a tha letling.

Miin “Hei hi I duh em” an tiha I duh loh chuan Aih I ti ang. I duh loh chhan sawi chhunzawm chiam a ngai lo.

Aih tih hi mahni inzahna a ni.

I hun I hlut a, a duh duh hnenah I hun I pe mai lo tih a lantir. Mi hlawhtling, buai em emin a mi nazawng hnenah a hun a pe lo. A mi bikte hnenah chauh a pe a, a hun a pawimawh em avangin miin amah an zahin a hun an hlut phah hlauh thung.

Aih tih I harsat chhan chu hun rei tak chhung I duh lo chung chunga Aw I tih thin vang a ni. 

Midang dah hmasa lovin nangmah indah hmasa zawk tawh rawh.

Nangman I duh leh duh loh chu I hria, I tana tha leh tha lo chu I hria. I remhriatna hmangin a hunah Aih I ti tawh ang. Chaltlai taka Aih tih kher a ngai lo, a chhan leh vang sawi a that leh sawi a ngaih hun pawh a awm thin. I remhriatna hmang rawh.

Mi hnena AIH kan tih hi mahni hnena AW kan tihna a ni.

Tun atangin Aih tih sawi zir thar leh rawh.

Riangvaite thian,

Zakzum Hmeltha